Sta mostra conta u percorsu d’una donna di prima trinca chì devia diventà artista in l’alta sucetà inglese. In fatta fine, truvò a so vera vucazione cù l’educazione di e giuvanotte. U so amicu Pasquale Paoli fù presente à ogni tappa di a so vita. E so lettere à Maria Cosway si ritrovanu à sta mostra. Ghjè u risultatu di dui anni di travagliu in cullaburazione cù istituzione inglese è taliane ricunnisciute. S’accumpagna d’un catalogu in lingue francese è inglese, illustratu è documentatu da storichi d’arte rinumati, specialisti di u 18u seculu, sott’à a direzzione d’Amandine Rabier, cumissaria di a mostra.

L’evenimentu permette dinù à u museu di Merusaglia d’esce da a so impiantazione lucale pè alzassi à livellu internaziunale cum’ellu hè statu decisu in u so prugettu scientificu è culturale. U destinu di Maria Cosway, nata in Firenze l’11 di ghjugnu di u 1760, pare cunnisciutu nanzu d’educà e giuvanotte : serà pittrice. In Firenze è Roma, l’artisti inglesi ch’ella scontra sò sicuri di u so grande destnu di pittrice di storia. In Londra, principia a so carriera cù a mostra di e so opere à a Royal Academy of Arts. À 22 anni, ghjè subitu un successu. Maritata à Richard Cosway, pittore ufficiale di u principe di Galles, riceve l’alta sucetà lunduniana in i so salotti musicali. U coppiu hà creatu una famosa cullezzione d’arte “La collezione Maria e Richard Cosway”. Amica di Thomas Jefferson, di Letizia Bonaparte, di u cardinale Fesch, di u pittore Jacques Louis David o di u scultore Antonio Canova, tesse una vera reta d’influenza in u mondu sanu. Pasquale Paoli a cugnumeghja “a decesima musa”. 

In u 1812, Maria Cosway fonda un cullegiu in Firenze pè femine inglese diventatu in u 1830 l’Istituto delle Dame inglesi. Dopu, stalla st’istitutu in Lodi à u nordu di l’Italia. Compra un cunventu induv’ella si stabilisce nanzu ch’ellu si stalli l’ordine religiosu della dama inglese. More in stu cunventu in u 1838.