Da u 18 à u 25 di lugliu, u paese di Patrimoniu accoglie a 33a edizione di e Notte di a Chitarra pè una prugrammazione torna strasurdinaria. Eccu a prumessa di Jean-Bernard Gilormini, direttore di l’evenimentu. Cusì, artisti cum’è u giovanu chitarristu sicilianu Matteo Mancuso, u 24 di lugliu, Sandrine Luigi, di Saint-Fiurenzu, u 25, Antonio Rey, maestro di a chitarra flamenca, u 18, sò stati invitati cù persunalità di a canzona pupulare cum’è Christophe Maé, sabbatu u 20, o Pascal Obispo, u 22, pè i trent’anni di a so carriera. Avemu dinù u gruppu The Wailers, cumpagni di Bob Marley, chì festighjerà i 40 anni di u discu Legend, vendutu à quasi 25 milioni d'esempiari in u mondu.

U paese di Patrimoniu, azzincatu à e muntagne sopr’à a magnifica cala di San Fiurenzu, vi prupone dunque un viaghju à u ritimu di e chitarre. Dapoi 33 anni, chitarristi lucali è passiunati, anu invitatu i so eroi. Ghjè l’appuntamentu annuale di i più famosi interpeti internaziunali chitarristi di jazz, blues, flamenco, manouche, rock, zingaru, tango è di musica classica. Prugrammu è riservazione : https://www.festival-guitare-patrimonio.com/