I 27 è 28 di lugliu, l’artisti feranu sente e più famose opere di a musica classica è di u bel canto cù un cuncertu baroccu in a chjesa San Martinu di U Viscuvatu sabbatu à 8 ore è mezu. Serà seguitatu pè a prima volta da un ballu pupulare à parte da 10 ore è mezu, piazza à u paese. Dopu nant’à piazza Bach in Erbalonga nant’à a cumuna di Brandu. Pè principià sabbatu u 27 di lugliu à 5 ore in Erbalonga un scontru litterariu cù Patrice Franceschi, scrittore aventurieru è u lindumane à 5 ore è mezu cù Gilles Keppel, specialistu di u mondu arabu cuntempuraneu è di l'islamismu radicale, scrittore, prufessore à l'università Parigi Scienze è Lettere. Sti scontri seranu seguitati da una cumedia musicale dumenica u 28 à 9 ore è mezu. 

Quist’annu, e serate liriche rivenenu cù a prumessa incantevule d’entre in u mondu induve a musica classica si rinventa. U direttore di i prugrammi Antoine Manceau vole stende u so ripertoriu à un publicu più diversu. D’altronde, u ballu pupulare simbuliseghja st’idea di cumunione, di mischju. Oghje ghjornu, pensa Antoine Manceau, u musicante hè pulivalente ùn si limiteghja à un solu generu musicale. L’artisti di e serate sò di prima trinca. Sò frà altru Judith Derouin, Sarah Laulan, Benoit Rameau, Igor Bouin. Cum’ellu hè l’usu, ùn si cunnoscenu micca prufessiunalmente. Serà dunque u so primu spettaculu inseme. Pè u so vintesimu anniversariu, e serate liriche volenu esse dinù una loda à u patrimoniu corsu cù unu di i più belli prugrammi di ste serate. Cusì dice Antoine Manceau.