A cronaca di Giovanni della Grossa, u primu storicu di a Corsica medievale, ùn avia ancu palisatu tutti i so secreti. Sta volta, in stu libru, ghjè a struttura stessa di a sucetà corsa medievale chì hè studiata da Michèle Ferrara : modi di vita, mentalità, esercitu di u putere è cumu l’isula s’integra à u Mediterraniu… A cronaca di u nutariu Giovanni Della Grossa hè a riferenza cardinale in e bibliuteche di i storichi dapoi a so redazzione à u XVu seculu. Ripigliata da Monteggiani, Ceccaldi, Filippini è publicata pè a prima volta à a fine di u XVIu seculu, rieditata da Giovanni Carolo Gregori à principiu di u XIXu seculu, tradutta in francese da l’abbate Letteron sempre à u XIXu, hè diventata un « monumentu » di a storiografia isulana. Tanti temi sò stati trattati: storia pulitica, storia suciale è culturale, raporti umani, lingua, clima, paisaghji è altri. In più, Giovanni Della Grossa dà infurmazione nant’à a so vita persunale in i so scritti cù aspetti biografichi, leie famigliale è di sughjezzione, viaghji. Seguità à Giovanni Della Grossa hè dinù un rumanzu d’aventura.

Di sicuru l’analisti preferiscenu u racontu di l’evenimenti, i persunagi storichi, i cunflitti. Oghje ghjornu, a vita di i Corsi di u Medievu hè cunnisciuta di più grazia à l’archeolugia è e ricerche in l’archivii. Cusì, u libru di Michèle Ferrara vene à rinfurzà a cunniscenza di sta perioda. Hè duttora in storia medievale à l’università di Corsica. U so travagliu hà ricevutu u premiu di tesa nant’à a cumunicazione scientifica in scienze umane è suciale di a cità d’Aiacciu in u 2021.