Venneri u 13 di settembre, a Casa di e Lingue hà presentatu u so prugramma pè u prossimu vaghjime in i so lucali di u carrughju Sant’Anghjulu di Bastia. Sin’à dicembre, più di 20 evenimenti sò previsti cù u scopu di fà campà a lingua corsa grazia à attività pè tutti qualsiasi u livellu. Attività pè fà scopre a lingua à un publicu sempre di più numerosu, da i zitelli di trè anni à e persone anziane è in leia cù a storia, l’econumia, l’arte.

Frà l’evenimenti maestri di sta prugrammazione, u 25 di settembre, a reta Canopé presenterà un arnese di cunghjucazione nant’à internet cù più di 10 000 verbi. Dopu, l’11 d’ottobre, l’associu Storia 97 intervenerà nant’à a storia di l’isula. U 21 di nuvembre, i vini di Patrimoniu à l’onore cù u so labellu AOP è a so ricunniscenza nant’à i mercati internaziunali. Tutte st’attività in lingua corsa pè mustrà ch’ella hè un elementu di mudernità, di cuesione è d’apertura nant’à l’avvene.

Pè mantene un’attività ogni ghjornu di a settimana in più di l’evenimenti prugrammati, un percorsu pedagogicu hè statu creatu nant’à a storia di a lingua corsa cù infugrafie è quizz interattivi. L’occasione d’incuragì a ghjente à vene à a Casa.