U tema di stu quintu numeru rimanda à u locu induve si và dopu à una vita esempiare ma omu spera u più tardi pussibule. Avemu dunque fole in leia : « A messa di u murtulaghju », « Miseria entre in Paradisu, A Fola di Peppettu”, “ A mamma di San Petru”, “u ponte di u Diavulu”… A paura di a morte hè cuntata quì sott’à tutti i celi, à tutte l’epuche, cù schema è parolle analoghe è sfarente. E fole rimandanu dunque micca solu à a Corsica ma dinù à altre isule, à u Mediterraniu è l’Europa. 

Sti libri sò l'opera d'un cullettivu d'una sessantina d'autori sott'à a direzzione di Ange-Laurent Bindi, Rinatu Coti, Paul Dalmas-Alfonsi, Claude Franceschi è Ghjuvan Ghjaseppiu Franchi. « Sò testi, puesie, raconti, detti racolti sopr'à locu, ogni tantu vicinu à famiglie di persone chì si ne sò andate à l'altru mondu o in l'archivii di e merrie, in e bibliuteche » spiega Claude Franceschi chì hà cuurdunatu l'operazione è fattu l'impaginatura. « Ci si trova e storie di i paesi, di persunagi chì ci anu campatu, raconti nant'à e chjese, fatti storichi, storie ogni tantu assai anziane ».  E pagine sò illustrate da i ritratti di Tito de Caraffa, Marie-Michelle Leandri è Anne-Lise Raffaelli.

« Ghjè a tradizione culturale corsa chì animeghja stu travagliu cumunu ingiru à u patrimoniu orale" insiste Rinatu Coti. « Fole, legende, raconti, a Corsica ùn ne manca. Cum'è altri populi in u mondu, à i Corsi li piace à dì, à parlà, cuntà, trasmette ciò ch'elli sò in u filu di una storia. Sta cullezzione hè un omagiu vivu di u patrimoniu immateriale di un'isula chì ùn si scorda di ciò ch'ella hè stata, di ciò ch'ella hè, di ciò ch'ella vole diventà".

Da sapè chì i benefizi di vendita di sti libri seranu pè l’associu di Rinatu Coti, Matina Latina, creatu in u 2002, chì u scopu hè di prumove è di sviluppà a lingua è cultura corsa ind'è l'adulti è i zitelli.