A piaghja orientale cuntinueghja à palisà i so secreti archeologichi. L’INRAP (Istitutu Naziunale di Ricerche Archeologiche Preventive) hà scupertu pocu fà pè a prima volta in Corsica un attellu di pruduzzione di teguli rumani di u primu seculu dopu à Cristu trà a sponda settentriunale di u Tavignani è u stagnu di Diana. 

Sti scavi sò stati cumandati da a DRAC, Direzzione Regiunale di l’Affari Culturali di Corsica. L’archeologhi anu trovu dinù vistiche di u primu età di u ferru, testimoni d’una prima fasa d’impiantazione umana. In stu quadru, avemu una cinquantina di strutture impetrate o chì si vedenu in parte. Custì, ci hè un materiale ceramicu di u locu è d’impurtazione etrusca cù numerosi arnesi macrolitichi. Ma l’interessu archeologicu maiò hè un attellu di pruduzzione di teguli rumani di u primu seculu dopu à Cristu. Ghjè un settore d’attività artigianale cumpletu cù tutte e tappe di a fabricazione di teguli chì si ponu  identificà. Un fattu novu chì ùn esiste in altrò in Corsica. U prucedimentu principia cù u ricolu di a terra rossa, a cucitura di e terre cotte architetturale fatta in un grande fornu pruvistu cù una camera di scalderia. Un secondu bastimentu ghjova dinù di dipositu pè allucà tutte e pruduzzione. Àl’ingiru, l’archeologhi anu scupertu un gruppu d’ottu sepulture cù un‘architettura di teguli. Per via di l’acidità di e terre, ùn anu trovu schenetri. Avemu dinù un’urna chì u cuntenutu ùn hè ancu cunnisciutu è chì serà scavatu in laburatoriu. In e sepulture sepulcrale, truvemu ufferte di vasi in ceramica o di balsamari in vetru. U travagliu dopu i scavi permetterà di precisà a datazione. E ricerche si pruseguenu sin’à u 13 di dicembre. Quelle nant’à l’elementi trovi, si prusegueranu à principiu di l’annu 2025 cù a participazione di ceramolochi, antropolochi, geomorfologhi, palinulochi, tutti membri di l’INRAP.

Infurmazione : Informateur Corse Nouvelle