St’evenimentu artisticu spone parechje riprisentazione feminile prestoriche mediterranie, da u Paleoliticu gravettianu (25 000 nanz’à Cristu) di l’industria litica à l’età di u Bronzu (1 500 nanz’à Cristu.). St’ogetti di petra, di terra rossa o d’ossu rimandanu à cunsiderazione suciale, culturale, artistiche è tenniche nant’à e donne è u so statutu. À tempu, permettenu d’interrugacci nant’à l’identità di e persone riprisentate. Seranu divinità o esseri mitichi ? Allegurie o persunagi veri cunnisciuti o anonimi ? Cumu, induve è da quale ste statuette eranu aduprate ? Eranu ghjoculi o ogetti d’un grande valore simbolicu ? Dunque, parechje interpretazione pussibule chì dipendenu da i lochi è da l’epuche. Hè l’occasione di fighjà u sapè fà raffinatu di l’artigiani di a Prestoria, adattendu e so tenniche à e risorse è à i materiali, ma dinù à i bisogni è à ciò ch’elle aspettanu e sucetà induv’elli travaglianu.

Femina Celesta presenta dinù a famosa donna di Campu Fiureddu, a pezza centrale, surtita da l’isula à a fine di u XIXu seculu. Duie copie sò sposte, una di l’esempiariu di u British Museum, l’altra di quellu di u Cambridge Museum. D’altrò, numerosi musei europei sò cullaburadori di a mostra. U museu d’antropolugia prestorica di Monaco hà prestatu sette Venere paleolitiche, venendu pè u più da e famose grotte di i Balzi Rossi in Liguria. E cullezzione di i musei di Cagliari è di Sassari mettenu in risaltu l’evuluzione di a riprisentazione di a donna pè u Neoliticu ind’un cuntestu vicinu di a Corsica. In quant’à a Dea accumpagnata di serpi, cù u so aspettu minacciosu, illustreghja a trasfurmazione prugressiva di u trattamentu stilisticu di u feminile durante l’età di i metalli à un’epuca induve a riprisentazione maschile diventa magiuritaria ind’a pruduzzione artistica. Pè l’epuche riprisentate, avemu dinù elementi di l’archeolugia corsa pè inserì l’isula in i grandi currenti d’idee chì traversanu u Mediterraniu prestoricu. Una prughjezzione murale conta a vita di a donna di Bunifaziu è infine diverse riprisentazione feminile è maschile pinte o intagliate sò di a prestoria corsa è sarda. Da vede sin'à u 15 di settembre di u 2025.