U filmu Le royaume di Julien Colonna hè statu ludatu da e critiche, grazia dinù à so attori, in particulare Ghjuvanna Benedetti. Ghjoca u persunagiu di Lesia, a figliola di Pierre-Paul, interpretatu da Saveriu Santucci. L’attrice riesce à trasfurmassi da a nucenza giuvanile à u nirore. Le Royaume hè un filmu assai tragicu à tempu corsu è universale nant’à una guerra trà banditi. Hè cumè un diamante è u so core hè Lesia. Illumineghja u filmu sanu cù u so sguardu à tempu zitellinu, salvaticu. Hè una giovana corsa spenserata chì campa u so primu amore. U so babbu pare fora di u so universu è cusì ùn capisce perchè a so zia a porta sin’à ellu. Ghjuvanna Benedetti hà tenutu a so voce zitellina è ghjè un elementu in più di u so misteru quand’ella scopre à pocu à pocu u mondu di u so babbu, di u so cumpare, di st’omi chì a prutegenu. Dunque si capisce chì Lesia principia un’iniziazione, da a spenseratezza à l’inchietudine è ogni tandu l’angoscia. Da u sole à una forma d’ombralume, da a nucenza à a scuperta di u peccatu incarnatu quì da quelli ch’ella tene caru è chì a prutegenu.

U so sguardu immensu, lindu à principiu hè sempre di più affuscatu da a paura di perde stu babbu ch’ella principia à cunnosce. Quasi una ricunniscenza chì diventerà fattiva quand’elli seranu soli vicin’à u mare tramindui. U babbu s’apre à a so figliola è li sprime u so amore. Ghjuvanna s’insurpa di e so parolle chì a facenu diventà da veru, in modu intensu a figliola di st’omu. A giovana cumediante schjarisce sta fusione sintimentale. Infine, l’ultima scena hè straordinaria. Lesia porta sempre e stimmate di l’accidente induve u so babbu hè statu tombu. Mira durante una longa stonda l’assassinu di Pierre-Paul chì hè un traditore ma dinù novu babbu di famiglia. Quellu chì incarna u principiu di a vita hè tombu da Lesia diventata una donna dopu à st’iniziazione terribule di a destruzzione di u so babbu ch’ella avia scupertu à tempu avà. A giovana hà persu a so zitellina è a so nucenza. Hà tombu. Altra scena di prima trinca : quella di a pesca, una stonda di felicità assai pura magnificata da a risa di Lesia è chì hè distrutta da a morte.  Un si sà ciò chì serà u so avvene. U filmu si compie è omu ferma scunvoltu da stu percorsu emblematicu purtata da sta cumediante attalentata assai. Attrice è suldata di u focu in Prunete. Un’altra passione di sta giuvanotta di 22 anni originaria di Santa Maria Poghju è studiante in scola d’infirmiera dapoi quist’annu. Allora preghemu una bella è longa carriera à Ghjuvanna Benedetti.