Corsu
Francese
Un'opera di Jean-François Bernardini, Hubert Perigot, illustratu da Ange-Marie Vesperini venduta à prò di l'edizione Umani.
Una fola umanista ispirata di a vita è di i scontri. Una bella storia ch'omu riceve in rigalu. Tempi fà, ghjè u ventu di l'amicizia chì hà guidatu l'autori ver di Hubert, quassù in lu so paisolu à pede di monti in lu so castellucciu di legnu. Sottu à a scala di a so memoria, ellu agrotta stalvati meravigliosi. "Una volta, ci era Hubert, a muvrella è a so mamma". Ghjè una storia vera. Nant'à i pughjali d'una vera muntagna corsa, a muvrella è Hubert esistenu da veru è ghjè ellu chì hà cuntatu à Jean-François Bernardini a so meravigliosa aventura trà umanu è muvronu.
UMANI hè un'organisazione assuciativa privata creata in u 2002. St'ONG vole purtà l’ambizione d’accumpagnà e trasizione è grande sfide di a pianeta. U so impegnu hè purtatu da una vuluntà d'inventà inseme novi avvicinamenti cullettivi più eculogichi è più umani, di fà sucetà. Dunque, st'organisazione sviluppa azzione à u più vicinu di i citadini è di l'imbusche di u territoriu. L'ambizione di st'azzione hè d'imaginà è di sustene iniziative chì porghjenu risposte cuncrete, in leia cù l'attori suciali, à l'imbusche maiò in Corsica è in altrò : preservazione di i patrimonii è di a lingua, educazione, sulidarità.
UMANI scumparte u so impegnu cù azzione è prugetti in leia cù 5 prugrammi à prò di u bè cumunu: nò viulenza, terranea à prò di u rurale è di i spazii naturali, università di l'omu, lingua viva, sulidarità.
In u quadru di sti prugrammi, i prugetti è azzione d’UMANI sò à u serviziu di valori universali è sustenenu iniziative chì valuriseghjanu i patrimonii naturali, culturali è propiu umani. Tutte l'azzione cundutte in Corsica, veru laburatoriu pè priservà un avvene più bellu, influenzeghjanu ancu e grande imbusche è sfide di a pianeta.