Un cullettivu s’hè impegnatu pè u patrimoniu è a cultura di Costa Verde. Ghjè un gruppu di persone senza travagliu membri di u dispusitivu Territoriu senza disimpiegatu, impegnatu cun passione in a a cooperativa di poca durata Flashcoop. Durante cinque ghjorni, anu travagliatu pè una missione precisa: creà un prugettu d’intrapresa chjamatu “E radiche sputiche di Costa Verde”. Un prugettu pè creà prudutti unichi ispirati da i lochi. Stu travagliu cullaburativu, cù assai creatività, hà illustratu secondu l’organisadori, u so impegnu pè ritruvà un impiegu. 

Hà principiatu u prugettu cù “a greva di u disimpiegu”. In stu quadru, ste persone anu assistitu à e cunferenze di Pascal Ottavi è d’Alexandre Giorgi in quant’à i persunagi è fatti storichi di Costa Verde. Grazia à st’intervenzione, anu creatu prudutti originali : affissi, cartuline, tote bag mettendu in risaltu u patrimoniu di Costa Verde cum’è u vinu Mariani chì hà ispiratu u Coca Cola, a nuciola, a clementina, a dualità mare-muntagna chì face l’identità di a Costa Verde. U publicu hè statu invitatu à scopre u risultatu di u so travagliu pè susteneli in a so dimarchja sulidaria è ambiziosa. Iniziatu dui anni fà in Costa Verde, da l’associu Corsica Sulidaria, u prugettu Territoriu zeru disimpiegatu à longu andà entre in a fasa di cuncretisazione. 

Durante sti primi sei mesi di u 2025, a stallazione di un’intrapresa cù u scopu di l’impiegu è a numinazione di u so direttore anu da cuntribuì à l’avviamentu di u prucedimentu pè fà sparì u disimpiegu à longu andà. Per quessa, hè prupostu à tutti i disimpiegati in sta situazione è vuluntari un impiegu di durata micca determinata, senza selezzione è adattatu à u so sapè fà è à a so ambizione.