A prima di st’azzione hè stata presentata u 30 di ghjennaghju da a reta Canopé, a CDC, u retturatu. A data di u 30 di ghjennaghju hè quella di a cunsulta d’Orezza, ghjornu di a prima dichjarazione d’indipendenza di l’isula cù Ghjacintu Paoli, u babbu di Pasquale. Creatu da u retturatu u materiale pedagogicu "Paoli in Lumi” permetterà à l’elevi di l’Accademia di Corsica di studià a vita di u capu generale in duie parte grazia à e risorse pedagogiche bislingue è documentarie. Avemu quì una visione muderna di u Babbu di a Patria, cù u studiu di u persunaghju in storia-geografia, arti plastichi, lingue, insignamentu murale è civicu, musica… da a scola primaria à a terminale. U studiu hè stesu à a Corsica, è aldilà à u Mediterraniu è à l’Europa di l’epuca. 

Nentru, truvemu video, podcast, schedule, articuli, quistiunarii, libri, cunferenze, mostre è altri travaglii di ricerca. L’inseme numericu è bislingu hè adattatu à i trè livelli sculari : primariu, cullegiu è liceu. L’insignanti ci truveranu materiali adatti creati da altri insignanti, ispettori, è e squadre di Canopé. Cusì, puderanu custruì prugetti diversi è in ogni disciplina. In stu modu, principianu e cumemurazione cù iniziative è festività chì puderebbenu durà aldilà di l’annu 2025. Ghjè un travagliu di memoria vulsutu da u rettore Rémi-François Paolini. Dice : “hè una di e missione essenziale di a Scola publica di purtà a lascita storica, culturale è patrimuniale di a Corsica cum’è a femu cù stu prugettu.” Ogni insignante di Storia cunsacrerà omancu un corsu nant’à a vita di Paoli toccu u mese di marzu sin’à u 6 d’aprile, ghjornu di l’anniversariu è di manifestazione culturale è educative aspettate in Merusaglia, paese di u "Babbu di a Patria".