A squadra di « A casa di a puisia », purtata da Norbert Paganelli, urganizeghja sin’à u primu di marzu in u quadru di u « Veranu di i pueta » un cuncorsu di puesia. A tematica scelta questu annu hè « A vulcanica »…

Sò avà parechji anni chè a squadra di « A casa di a puisia » s’impegna à prò d’issa spressione quì, chì in Corsica ci vole à dilla, cunnosce assai difficultà. « Un hè tantu faciuli, ind’è noi, di prumova tuttu ciò chì tocca à a cultura, spiega Norbert Paganelli, capimachja d’un associu natu in tempi d a crisa sanitaria, tutti l’anni hè una vera scummissa di riescia à metta in piazza manifestazioni. U rolu di i media hè assai impurtanti da pudè aiutà ci. »

L’associu, chì travaglia nantu à parechji prughjetti, hà un « spechju » maiò, ogni annu, cù « U veranu di i pueta », una manifestazione naziunale chì si sviluppa in tutti i rughjoni. « Tuttu u mondu si ramenta di l’annu scorsu, ripiglia u respunsevule, induva aviamu sceltu di rende umaggiu à Antoine de Saint-Exupéry, à l’occasione di l’ottanta anni di a so sparizione. »

Questu annu, a casa di a puisia s’hè arrimbata nantu à a tematica naziunale « Vulcanicu ». Un’iniziativa in leia cù a celebrazione di u centenariu di u muvimentu surrealisimu principiatu in u 1924 da André Breton. Ma una tematica abbastanza larga da sviluppà.

« Si tratta, di sicuru, di u « Vulcanicu », aghjusta Norbert Paganelli, ma parechji tematichi poni essa sviluppati intornu à issa parodda. Si pudaria trattà, aldilla di l’aspettu geologicu, di spressioni artistica, u vulcanu pò riprisintà dinù a collera, i sintimi, ecc. Lascemi i candidati scelglia a so tematica in funzioni di u so imaginariu. Ùn ci hè, cum’è in tutti l’arti, qualcosa di fissu. Si pò scriva in puisia o in prosa, in francesu o in corsu »

I candidati anu sin’à u primu di marzu per mandà u so scrittu secondu à regule specifiche : una pagina A4 (Times New Roman, 12. U tuttu in lingua francese (una pagina) o in lingua corsa (cù una seconda pagina dedicata à a traduzzione) à casadiapuisia@laposte.net. « U cuncorsu è apartu à tutti, pocu impremi u niveddu, in corsu o in francesu. Ci sarani dui sessioni, una pà a lingua corsa è l’altra pà a lingua francesi. »

D’aprile o di maghju, a ghjuria, scelta frà persunalità di u mondu di l’arte (ma micca cunnisciuta sin’à l’ultima di i candidati) sceglierà a creazione chì li piace u più in e duie lingue. « Di regula, tuttu u mondu hè d’accunsentu pà ciò chì tocca à i resultati, ùn ci hè surpresa. »

In fine, i vincitori averanu un’opera d’arte d’un valore di 500 euri è dinò, una publicazione ind’un’antulugia ch’hà da adunisce tutti i scritti. Ciò chì si face tutti l’anni.

« U cuncorsu hè a manifestazioni maiò di u nosciu associu, preciseghja Norbert Paganelli, pà noi, hè u mumentu assai impurtanti da mettacci in vali. Fora di què, prupunimu furmazioni è sulcà issa vulintà di dà un soffiu novu à a puisia corsa, chì, cum’è a lingua, hè oghji in difficultà. Eppuru, a qualità ùn manca trà quiddi chì scrivani, quiddi ch’impruviseghjani o d’altri. »

Favurizà a pratica, a creazione, furmà è assicurà a mediazione cù i media è un publicu largu, eccu e missione ch’ella prupone a Casa di a puisia. Aspettendu d’andà cusì luntanu, u cuncorsu « U veranu di i pueta » pò sensibilizà a ghjente. Una bona ind’un mondu induve l’arte perde, ogni ghjornu, un pocu di a so piazza è di u so estru.

Origine : Journal de la Corse