Hè stata uffizializata a prima cunfraterna di studianti corsi, stallata in chjesa di l’Annunziazione in Corti durante celebrazione cù a participazione di u cardinale Bustillo è parechje altre cunfraterne corse. U patre Christophe Boccheciampe n’hà avutu l’idea. I so ottu membri l’anu chjamata San Gregoriu Magnu in omagiu à u Papa Gregoriu Primu chì campò à u sestu seculu. St’ultimu hè statu sceltu cum’è prutettore di l’Università di Corsica durante una messa u 12 di marzu di u 1764. Sta cunfraterna hè una manu tesa versu a giuventù universitaria chì vole campà a so fede. Era bramata da i studianti in particulare dopu a ghjunta di u Papa in Aiacciu è cusì hè venuta di più ghjente durante e messe. 

U camisgiu hè rossu, culore di San Gregoriu, è a mantelletta bianca, cum’è quella di l’Immaculata Cuncezzione. I cunfratelli seranu aiutati da a cunfraterna San Teofalu di Corti. Travaglieranu cù l’associu Aiutu Studientinu pè sustene i studianti poveri. Anu da animà canti sacri è participeranu à e ceremonie religiose di Ghjovi è Venneri Santi. Cusì, sta nova cunfraterna universitaria vole esse un simbulu di spartimentu, di fede è di sulidarità in u spiritu di i valori di San Gregoriu Magnu cunnisciutu pè u so impegnu vicin’à i più poveri.