Cullocchii, mostre, spettaculi, creazione numeriche, artistiche, documenti inediti.… Cù una trentina d’evenimenti urganizati à traversu l’isula, hà da rende umagiu l’Università di Corsica à sta persunalità maiò di a storia isulana. U scopu : trasmette a so lascita è ispirà si di l’aspetti nuvatori di a so azzione.

« Era evidente è impurtante ch’ellu s’impegni u stabilimentu per cummemurà sta persunalità maiò di a nostra storia è chì hè turnata à inventà, à u XVIIIu seculu, l’apertura di a Corsica di pettu à l’Europa è u mondu, o puru a piazza di l’educazione inde a sucetà”, cunsidereghja Dominique Federici, u presidente di l’Università di Corsica. Venneri u 14 di marzu, hè statu svelatu un affrescu nant’à a facciata di a facultà di dirittu, rialisatu da l’artistu talianu Andrea Mattoni dettu Ravo. S’ispira di a litugrafia di Charles Etienne Pierre Motte, ella stessa rialisata dapoi un disegnu di Jean-Baptiste Mauzaisse.. 

In più di l’aspettu cumemurativu tradiziunale, si tratta di fighjà in modu novu l’opera di Paoli fundendusi nant’à e tappe principale di u so percorsu. Vale à dì a dichjarazione d’indipendenza di pettu à a Republica di Genuva in u 1755, l’esiliu di Paoli, a redazzione d’una custituzione corsa è a cunquista francese in u 1769. 

« L’Università vole dinù rammintà l’opara di Pasquale Paoli è di turrà à intarrugà a storia dipettu à i sfidi di a sucietà ughjinca, com’è u raportu à a citadinanza, à l’educazioni, a tulleranza rilighjosa, spieca Francescu Maria Luneschi, incaricatu di missioni lingua è cultura corsa à l’Università di Corsica, è capimachja di u prughjettu. Ani da parmetta sti manifistazioni di sparghja i cunniscenzi acquisiti da i circadori di l’Università è aldilà, pà mettali in lumi, in un chjami è rispondi trà scienza è cultura ».

I sfarenti evenimenti rammenteranu l’itinerariu intellettuale di Paoli in Corsica cù tappe in Capicorsu, l’estremu sudu, Merusaglia induve l’università tenerà simbulicamente un cunsigliu d’amministrazione. Cumemurazione sò previste dinù fora di l’isula, per esempiu in Napuli, capitale de l’illuminismo è locu di furmazione intellettuale di Pasquale Paoli, cù un viaghju pedagogicu di i studianti di lingua è cultura corsa. «Ci tocca à fà di st’avinimentu un vittori di scambii, spieca Francescu Maria Luneschi. Aldilà di a diminsioni righjunali, si scrivi dinò sta valurizazioni di i cunniscenzi inghjiru à a parsunalità di Paoli, in una dimarchja intarnaziunali, pà via di a stampa ch’eddu hà lasciatu in a storia ».

PRUGRAMMA : https://www.universita.corsica/fr/300-anni-pasquale-paoli/