Ghjè un viaghju musicale d’ondeci tituli trà riacquistu è America Latina. U gruppu « Primavera » face a so strada dapoi, oghje, vint’anni, in l’universu di u cantu corsu. À l’iniziu, ci era una passione, quella di Mathieu Casanova, capimachja di a struttura, per i ritimi è e meludie d’America Latina. « Eramu dui cù Michel Tomei, spiega u cantadore, è, dopu à una sperienza cù « Vaghjime », aviamu fattu nascia « Primavera » à u principiu di l’anni 2000. »

« Prima, faciamu sopratuttu animazioni. Strada facendu, avemu dicisu di fà un gruppu cù creazioni, canzoni è cuncerti. » Mathieu Casanova, ellu, hà riesciutu à tramandà a so passione per e musiche d’America Latina : Messicu, Perù, Bulivia è purtà, da unepoche di viaghji, qualchì strumentu cum’è u Ciarangu, u tiple, bombu, flauti, percussione ma dinò strumenti più cunnisciuti (viulinu, ghitarra). Cusì, hè natu un primu dischettu in un 2007 : Primavera, in riferenza à u gruppu è quand’ellu sbuccia u veranu. U gruppu s’hè fattu cunnosce, masimu scuntrendu a squadra mittica di Quilapayun. « Un mumentu maiò ind’un nostru parcorsu, aghjusta Mathieu, è aviamu ripigliatu, ma ùn eramu micca i soli, a famosa canzona « El Pueblo Unito... ».

In u 2017, una seconda squadra hè nata cù membri novi cum’è Fabrice Massiani. « Mancava qualcosa in u cantu corsu, spiega quellu, ci vulia à andà à cercà altrò, manere di piazzà e voce, ritimi novi,ecc...Hè per quessa ch’eu sò ghjuntu in u gruppu. »

A squadra nova hà travagliatu durante qualchì annu nantu à a scrittura è a cumpunizione di un dischettu novu : « Ci faremu un passu ». Ondeci tituli chì trattanu di tematiche oghjinche. Pueti cum’è Petru Canon, Letizia Cosimi, Ghjuvan Federicu Terrazzoni, Pasquale Renucci ma dinò Mathieu Casanova, anu purtatu à so piuma à issa bella opera. 

S’ellu hà aspettatu, per via di u travagliu è di l’impegnu di tuttu u mondu, più di 15 anni per esce issu dischettu novu, l’andatura di u gruppu hè sempre a listessa : u piacè di ritruvà si inseme, di ripete, cantà è travaglià. Si canta l’amori è a libertà. A diversità di i scrittori ci hà parsu una bona, cum’è tempi fà cù Canta u Populu Corsu. Hè dinò unu di i scopi di u gruppu di metta in vali issa diversità. »

Dopu l’esciuta di u dischettu, u gruppu hà da appruntà una campagna di prumuzione di manere à sparghje lu. Avemu da pruvà à fà qualchì cuncertu. Eppo, avanzaremu à pocu à pocu strada facendu.». Una squadra da seguità chì s’hà da pruduce iss’estatina vicinu à i lochi di ripetizione.