Primu appuntamentu stu marti primu d’aprile cù dui documentari​ : "Paoliwood" & "James Corsica Boswell" rialisati da Lionel Dumas-Perrin à parte da nove ore menu un quartu di sera. 

Ind’u primu “Paoliwood” : una squadra di televisiò corsa rialiseghja un documentariu nant’à u persunagiu storicu di l’isula, Pasquale Paoli, eroe di giuventù di u famosu Napulione. A mumentu datu sta squadra s’accorge chì, durante e so interviste, parechji corsi aspettanu chì un famosu rialisadore d’Hollywood faccia un filmu nant’à a vita di u Babbu di a Patria. Cusì, hà da pruvà à prupone stu prugettu à una videtta americana.

In u secondu James "Corsica" Boswell : in u 1765, cerchendu à ùn fà micca una carriera d’avucatu bramata da u so babbu, un giovanu scuzzese, James Boswell, cunsigliatu da Jean-Jacques Rousseau, decide di vene in Corsica pè scuntracci u capu di i rivuluziunari di st’isula riputata periculosa… Scuntrava à Paoli chì cambiò a so vita pè u sempre è cusì principiò a carriera di u babbu di a biugrafia muderna James Boswell.

Dopu, serata speciale in l’emissione "Sinema Paradisu" cù u filmu "Les exilés ", è un dibattitu venneri u 4 d’aprile à 9 ore menu un quartu. Stu filmu di Rinatu Frassati conta à u 18u seculu u percorsu d’un giovanu suldatu francese chì deve dà una lettera à Pasquale Paoli. U suldatu scontra u vechju Ghjacintu chì hà da pruponeli un viaghju iniziaticu. Cusì, si ritrova in core di una di e pagine e più impurtante di a storia di a Corsica. Dopu à u filmu, u presentadore Laurent Simonpoli riceverà u rialisadore Rinatu Frassati, Dominique Maestrati rialisadore di « L’exilé, Paoli et Maria » » documentariu di finzione nant’à l’esiliu di Paoli in Inghilterra, è Lionel Dumas rialisadore di a seria Paoliwood nant’à u tema « Paoli persunagiu di cinema ». Perchè u cinemà ùn illustreghji micca stu persunagiu, simbulu di a libertà è di a demucrazia ?

Sabbatu u 5 d’aprile à 7 ore, edizione speciale di u "Corsica Sera", presentata da Jean-André Marchiani in direttu da l'Università di Corsica.

Dumenica u 6 d’aprile à 7 ore è 20, ghjornu di l’anniversariu di Pasquale Paoli, "Emissione Speziale" in cunventu di Casabianca, induve Dominique Moret evucherà a lascita di Paoli è a so rinomina internaziunale cù Eugène Gherardi, prufessore à l'Università, u storicu Antoine-Marie Graziani, Claude Bensimon di l'associu "Fochi Paoli". Piccule sequenze dopu u Corsica Sera, seranu cunsacrate à l’evenimentu da u luni à u venneri cù tematiche ecunomiche, culturale, pulitiche è ancu spurtive ! Infine sò previsti, in più di una pagina nant’à u situ corse.france3.fr, moduli corti prima pè e rete suciale, nant’à a pagina Instagram di Via Stella à parte da u 6 d’aprile è dopu à a televisiò. Presenteranu a storia di u “Babbu” in corsu è francese.