Sta 32a edizione si scumparte à u centru culturale Una Volta, carrughju César Campinchi, à u museu è l’arsanale, spaziu Petru Mari di a citadella, in a mediateca è à a Galleria Neru è Biancu, 2 carrughju cardinale Viale Prela, vicin’à a piazza à u mercà. 

Si puderà visità in particulare a mostra tematica, cullettiva è scenugrafiata, Bande Des Cinés chì mostra l’affascinamentu di l’autori pè u sinemà. Da i dispusitivi tennichi inventati da “my bridge” è disegnati da Guy Delisle, à e sperimentazione d’Henri Georges Clouzot pè L’Enfer, filmu maladettu mai compiu è chì si ritrova in a BD di Nicolas Badout. Avemu dinù una mostra nant’à Pasquale Paoli rialisata da i sculari CM1 è CM2 di René Subissi in u quadru di i 300 anni di a nascita di u babbu di a patria. L’opera face rinvivì a figura storica, ma incarnata in modu sfarente, cum’elli a vedenu i zitelli, è di sicuru rispettendu a storia è e so fonte. A sperienza pruposta hè un omagiu à u pensamentu mudernu di Paoli. Altra mostra cullettiva : Voir à travers soi di e disegnatrice Claire Braud, Edith Chambon, Clothilde Delacroix, Alix Garin, Aude Mermilliod. Presenta i so traumatismi analisati è purtati cù a scrittura grafica.

Da vede altre mostre individuale cù Camille Louzon, Brecht Evens, Fabien Vehlmann, Caroline Nasica, Bernadette Gervais, David Wautier, è Bastien Contraire.

Senza scurdassi di u premiu di i liceani chì devenu sceglie trà trè BD pè iniziassi à a fascia figurativa cuntempuranea ma dinù Victor Hussenot, Simon Roure è Aurélie Wilmet.