Tutti l’anni, Merusaglia festighjeghja u ritornu di e cendere di Pasquale Paoli cù I Fochi Paoli. In u 2025, serà sabbatu u 31 di maghju. Quist’annu, cù e celebrazione di i 300 anni, a 7a edizione di i Fochi Paoli di l’associu I Fochi Paoli hà decisu di sparte un prugettu simbulu di a cumemurazione di st’anniversariu. Ghjè 1725-2025 : Pasquale Paoli, l’Ora di u Ritornu. Stu prugettu ferà rinvivì u viaghju di a so salma da u campu santu di San Pancraziu in Londres à a cappella famigliale di a so casa nativa di Merusaglia in u paisolu di Stretta.

A manifestazione principierà dunque cù a ghjunta di u battellu « L’ora di u ritornu » à u portu di L’Isula traspurtendu una fiamma simbulisendu i valori veiculati à u seculu di i lumi da u Babbu di a Patria, vale à dì umanismu, fratellanza, spartimentu, tulleranza, sulidarità è libertà. Dopu, ogni tappa di u percorsu di a fiamma sin’à Merusaglia serà fundata nant’à l’organisazione di e festività in leia cù I Fochi Paoli. Serà purtata da i membri di l’associu vestuti in cumbattanti di l’armata di Paoli traversendu e cumune di Belgudè, Ponte Novu, Corti, Campile / A Casabianca, Bastia, Borgu, U Quercitellu, A Porta, Pedicroce/Campana sin’à Merusaglia. 

St’evenimentu si vole participativu è appartene à tutti quelli chì volenu mantene u spiritu Paolistu. Cusì, a fiamma serà trasmessa à l’abitanti di a cumuna traversata è di e cumune vicine chì incenderanu fochi pè manteneli sin’à u 31 di maghju. Dunque, una manera di trasmette a storia cum’ella l’hà trasmessa u Gran’ Pasquale.

Di più infurmazione : https://www.facebook.com/IFochiPaoli/?locale=fr_FR