Dapoi u 2018, l’evenimentu mette in risaltu u teatru vivu pè tutti. Quist’annu, da u 2 à u 16 d’aostu, u festivale serà organisatu dinù in Santa Lucia di Tallà à una trentina di chilometri d’Olmetu. Una decisione pè fà cunnosce ancu di più l’opere, scuntrà e cumunità rurale, occupà in modu artisticu novi spazii patrimuniali. A prima sequenza si ferà da u 2 à l’8 d’aostu in Olmetu. A parte da a sera di u 2, u cuncertu d’apertura di u gruppu Panzetta Paradise trà rock garage è sunurità isulane, un’allusione à l’arradichera territuriale di u festivale è à a so libertà estetica. A listessa sera è dinù u 6 d’aostu, “Médée Matériau” piazza à a chjesa, un’adattazione cuntempuranea di u testu d’Heiner Müller, rialisata da Anaïs Lechiara. U 3 d’aostu nant’à u parking di a surgente, a cumpagnia Bal’Dilà prupone “La danse d’après”, una creazione curegrafrica. U 5 d’aostu, à i Bagni di Baracci, a cumpagnia “L’Etoile” ghjoca “Dans la forêt”, una traversata trà testu, lume è corpu. U 7 d’aostu, sempre nant’à u parking di a surgente, “ E furmicule”. Una mostra teatrale in lingua corsa hà da cumpletà sta settimana di spettaculi. In più, ogni ghjornu, intervenzione, letture, perfurmenze o stonde teatrale sò previste e fine di dopu meziornu è e serate.

Dopu sta settimana in Olmetu, u Festivale si tramuterà in Santa Lucia di Tallà da u 14 à u 16 d’aostu, in cunventu San Francescu. L’occasione di fà rinvivì spazii rurali, patrimuniali. A prugrammazione in stu paese principia cù “Prunu – Di u to sangue preziosu”, una creazione di a cumpagnia Partage de Minuit. Rialisatu da Paul-Alexandre Fortini, u spettaculu presenta u percorsu di trè giovani corsi chì u destinu ciotta in a tragedia muderna . Infine, u 16 d’aostu, dui spettaculi digià presentati in Olmetu seranu ripigliati: Médée Matériau è La danse d’après. Cusì, u Festivale si stende inde i paesi è cunfirmeghja a so vucazione di teatru di vicinanza, pupulare. Face spuntà nove scritture, accumpagna i giovani creatori corsi, difende a creazione cuntempuranea, è inventa una manera sfarente di fà circulà l’opere nant’à l’isula. U publicu ci truverà l’occasione di scopre un teatru vivu, impegnatu, pueticu chì dialugheghja cù i lochi è l’imbusche di u so tempu.