St’opera vi prupone ballate, pop rock, canzone classiche di a canzona corsa è  bossa-nova cù a participazione d'una mansa d’artisti invitati. Cagna hè arrigistratu cù a cumplicità di i musicanti chì participeghjanu à u giru di u Jean Menconi è curisti marsegliesi di u Gospel'N'Soul Voices diretti da Géraldine Bueno.  L’amatori di ballate rumantiche deverebbenu esse incantati da  “Amore sin à more” o “Sè tù ere tù”. E migrazione per via di e guerre sò evucate in a canzona “Per U More”, in un stile assai pop rock.

D’altrò, avemu a canzona umanista “A mio preghera”. U dischettu permetterà di stà à sente dinù unu di l’ultimi testi di u ben’ di Petru Baghioni, anzianu membru di l'Albinu, cù una canzona scritta pè a San Valentinu. A canzona Cagna hè cantata cù u sintetisore è un cennu d’ochju à a Brittagna. Menconi ripiglia dinù canzone classiche : trè versione di “Ùn sò micca venuti” di I Muvrini, frà ella una versione radiufonica cù Sébastien El Chato, “Corsica” di Petru Guelfucci cantatu cù Adrien Susini, u “Bella Ciao” in una versione live.