« Cari amichi, auditori di l’emissione o nò, oghje mi permettu, circendu di fà cortu, di divvi duie parulle nant’à a festa ch’o circhemu di fà u 20 di settembre prussimu in Corti pè i vint’anni di “Dite a vostra” à l’Università di Corsica. » Cusì lampa una chjama nant’à a so pagina Facebook, u fundatore di l’emissione a più pupulare nant’à RCFM (cù forse u forum), Ghjuvan’Carlu Marsily.

Ci hà messu tutta a so passione. Passione di a lingua, passione di a ghjente, passione di u scambiu. Dite a vostra hè un appuntamentu per l’innamurati di a nostra lingua, ch’elli sianu sapienti o principienti, tutti à paru cù u piacè di sparte, di sparghje, d’amparà, di tramandà ! Chì bella missione ch’ella s’hè data st’emissione, è chì più bella testimugnanza d’una lingua viva chè di sentela parlà nant’à l’onde ? Oghje Ghjuvan’Carlu Marsily lampa dunque una chjama da festighjà sti vint’anni inseme d’impegnu, cù tutti quelli chì a volenu, inde l’allegria è a fratellanza. A famiglia « Dite a vostra » hè fatta per esse allargata. Sè vo tenite caru à a lingua corsa, affaccatevi, chì piazza è spaziu di parulle ci n’hè per tutti ! « Ùn serà un spettaculu ma una cuncolta di passiunati, à chì vole cantà canterà, senza artifizii o cusì pocu, circheremu à fà piazza à tutti, prufeziunali cum’è amatori, l’idea hè di sparte, di mughjà è briunà u nostru amore à sta lingua ch’ùn vole more » dice torna Ghjuvan’Carlu Marsily.

Allora ritenite sta data di u 20 di sittembre è cuntinuate à suminà cum’hè statu fattu dapoi 20 anni à traversu à l’onde. Hè cusì ch’ella camperà a nostra lingua !

Origine : Arritti