Stu fruttu savuritu è i so prudutti derivati seranu à l’onore durante una fiera chì face parte di a FFRAAC (Federazione di e Fiere Rurale Agricule è Artigianale di Cismonte). Solu l’artigiani è pruduttori sò accettati. I 12 è 13, sò i ghjorni di cunferenze nant’à l’arburu cù visite nant’à u situ, scontri cù i respunsevuli di a Camera d’agricultura di Pumonte è u sindicatu di i Giovani Agricultori, attellu di i sapè fà rurali è infine serate canterine. U 14, serà l’apertura ufficiale di a festa di u ficu cù più di 70 artigiani è un pruduttu impurtante pè a valle di Peri. I pepinieristi di Castellucciu è u sindicatu di a cultelleria corsa participeranu. In più, un cultellaghju funderà u bronzu. Quist’annu, serà a nascita ufficiale di a cunfraterna di u ficu chì u patronu hè San Bartulumeu cù a benedizzione di u prete chì benediscerà a fiera.