Dapoi a so creazione, u festivale Isuli Mondi hà rispostu à a chjama di u mare è di l’oceani pè una strada imaginaria nant’à ste duie zone, in cerca di nove isule à scopre, belli prugetti à imaginà. St’ultime rispechjanu spessu a Corsica postu chì ci hè tante cunvergenze trà tutti sti teritorii è a nostra isula.

Dopu à l’Islanda è l’isule giappunese in u 2023 è u 2024, u festivale Isulimondi metterà in risaltu l’isule purtughese di Madera, l’Azzore è Capiverde induve soffianu l’alisei è i venti africani. A leia cù a Corsica hè fatta cù l’etnomusiculogu Michel Giacometti, natu in u 1929 è mortu in u 1990. S’hè sempre primuratu di raccoglie, priservà è valurisà a musica tradiziunale rurale portughese. Un omagiu li serà resu cù a participazione di persunalità di musiche è di cinema, in particulare Teresa Garcia Fernandes, specialista di u cinema portughese.

Durante a manifestazione, si ferà un viaghju in l’isule Azzore cù Louis Marrou, Jean-Yves Loude, etnologu è Philippe Despeysses. Cù Michel Chandeigne, si scuprerà l’universu vegetale diviziosu di st’isule è cù Jean-Louis Pieraggi, a vitalità strasurdinaria di l’arburi rimarchevuli in Corsica. E serate seranu musicale cù OFCOR’S, è u gruppu Rundinelle. Dopu, cù Radio Mindelo Quintet è Bruno Abati, si senterà a musica di u Capiverde. L’arti grafichi si sponenu à u Lazaret cù u viaghju musicale di Viviane Lièvre à u Capiverde, Paisagi è Tebaide d’Alexandre Pozzo di Borgo, e Donne di a rena di Dominique Robelin, l’erbaghju marinu di Camille Pozzo di Borgo.

U cinema prupunerà una selezzione d’11 filmi à scopre. Da i paisaghji vulcanichi à e strette di Lisbonne, da i visi zitellini à i canti d’addiu, sta prugrammazione traversa l’imaginarii di l’isule purtughese è aldilà. Documentari, finzione, ritratti intimi o raconti iniziatichi : sti filmi evucheghjanu l’esiliu, a filiazione, a memoria, a gioia o a rivolta. Opere di cinema puliticu è pueticu. Averemu dinù un appuntamentu cù e rialità pulitiche di sti spazii isulani : Madera è l’Azzore sò autonome dapoi u 1976, u Capiverde hè indipendente dapoi u 1975. Si ferà ancu onore à i savori portughesi è corsi. Infine, una grande cena appruntata da i piscadori incanterà à tutti.