À l’iniziativa di l’artistu Micheli Solinas, l’idea d’impegnà si musicalmente à prò di u mondu rurale hè sbuccata, qualchì tempu fà, nantu à un cuncettu chì adunisce una squadra allargata di musicanti isulani : a « ghinghetta vagabonda ». U scopu hè di fà u giru di i paesi corsi ind’una caravana accunciata à modu « canterinu », per prisentà canti è musiche di a tradizione ma dinò creazione.

Ùn si contanu più i prughjetti di l’artistu « Ziu » Micheli Solinas : da Contraversu sin’à Tarraniu, passendu per a Zilimbrina o ancu creazione individuale... Ultimu prughjettu: « A ghinghetta vagabonda », un cuncettu itinerante cù u scopu di prisentà canti è musiche di a nostra tradizione ma micca solu (jazz, creazione per indettu) è sempre arrimbati à una radica corsa.

Si tratta, tandu, di a ripresa di i repertorii di canti populari è di a musica da fà ballà a ghjente. « U repertoriu populari hè pocu adupratu ind’è noi, aghjusta Micheli Solinas, hè una manera di prisintà lu è di metta lu in vali in un modu naturali. »

Cusì, a prima squadra si cumpone di musicanti rinumati cum’è Jérôme Susini, tercanu di u jazz (ghitarra è mandulina), Thomas Moscardini, chì face parte, à tempu, di a struttura « Tarraniu » (pianò, percussione), Micheli Solinas (ghitarra, cantu viulinu, mandulina…) è Régis Renucci (contrabassa). Un travagliu chì hè dighjà sbuccatu nantu à una prima creazione : A Porta, scritta da Stefanu Sage è cumposta da Micheli Solinas cù accunciamenti di Jérôme Susini. Un inseme appena jazz manouche di gran qualità. È un inseme chì, per avà, tene a strada. « U più impurtanti avali, ripiglia l’artistu, hè di truvà una caravana è d’accuncià la di manera à pudè girà. » Una chjama hè stata mandata per un finanzamentu in issu sensu quì.

Ma aldilà, u scopu hè dinò, di fà campà i paesi corsi durante l’invernu, à l’usu veghje, ch’elli sò vioti. E squadre anu da travaglià nantu à un repertoriu precisu fattu da musiche da fà ballà, canzone populare è creazione chì entrenu in issu cuncettu festivu. Una squadra, à l’usi anfarti, da seguità per issi paesi...

Origine : Journal de la Corse