A Cinemateca di Corsica, a Cullettività di Corsica è l'Associu Scopre vi pruponenu un omagiu à a resistante Noelle Vincensini i 20 è 21 di settembre in Marignana, è dinù i Scontri i 26, 27 è 28 di setembre.

Nata in Pedicroce ind’una famiglia di 9 figlioli in u 1927, hè partuta à l’altru mondu u 22 di maghju scorsu. Fubbe bramosa di ghjustizia durante a so vita sana. Internata in u campu di Ravensbrück, hà campatu à 17 anni a barbaria nazista. Dopu esse vultata à a vita civile è essesi riadattata à un mondu pocu primurosu di u so calvariu, si stallava cù u scrittore Jean Pierre Chabrol in u rughjone di e Cevenne è nascenu 4 figlioli. Vint’anni dopu, volta in Corsica. Face studii d’etnugrafia è rialiseghja filmi. Crea in u 1981 Sinemassoci (un gruppu d’associ mutivati da u cinemà). Hà sempre luttatu contr’à u razzismu. Una lotta simbulisata da u cullettivu contr’à u razzismu Avà Basta. Noëlle Vincensi hà sempre testimuniatu di a so vita addulurita in Ravensbrück pè ch’ellu ùn volti mai più stu passatu cusì vicinu. In l’omagiu di sabbatu è dumenica, filmi è un dibattitu anu da permette à u publicu di scopre sta persunalità chì face onore à l’isula.

Sabbatu u 20 di settembre

-3 ore "Le rire du bourreau" d'Elsa Chabrol.

-4 ore "Stonde" di Noëlle Vincensini.

-5 ore è quartu "Une citoyenne volontaire" di Jean-Pierre Mattei

-6 ore è mezu "Le souvenir de Noëlle". Dibattitu direttu da u giurnalistu di Via Stella Sébastien Luciani
-9 ore è mezu " Da fassi una spulendata" di Noëlle Vincensini.

Dumenica u 21

-Duie ore è mezu "Da la piaghja à la muntagna" di Noëlle Vincensini.

-4 ore "La vie est belle" di Roberto Benigni.

In memoria di Noëlle Vincensini. Dicia chì stu filmu li ricurdava a rialità ch’ella hà campatu.