Ghjovi u 18 di settembre, a Casa di e Lingue presentava a so nova stagione culturale pè tutti i publichi. L’occasione à tempu di svelà un’opera nant’à Pasquale Paoli creata da Adrien Martinetti, cumandata apposta pè celebrà i trè centu anni di a so nascita. Intitulata “Campate felici”, riprisenta à Paoli tenendu in manu a Custituzione di u 1755. Dopu, ci hè stata a presentazione di u prugramma di u primu trimestru di sta nova stagione pè tutt’ognunu. Ci truvemu i sugetti di a nostra sucetà evucati grazia à tematiche sfarente, cum’è a cunniscenza d’autori, cunferenze, ghjochi o cuncerti intimisti, spieca Alex Negroni, amministradore di a struttura.

A stagione s’apre cù un cuncertu di u gruppu Tavagna, dopu un escape game in cità nant’à u temu di Pasquale Paoli pè i zitelli à parte da 6 anni. U prugramma si pruseguerà nant’à a festa di Sant’Andria, un scontru trà autori, insignanti è attivisti impegnati pè a difesa è a trasmissione di a lingua corsa è a truppa teatrale di Cervioni frà altri numerosi appuntamenti da scopre in e prossime settimane. In più di i so evenimenti, a Casa di e lingue accoglie strutture residente cum’è Praticalingua o Canopé, chì pruponenu attività in immersione l’annu sanu. Corsi di corsu ma dinù di chitarra, viulinu, cantu è ancu corsi di talianu, inglese è spagnolu in lingua corsa !