In u quadru di i 300 anni di a nascita di u Babbu di a Patria, stu spettaculu mischjendu teatru, cantu è fiura hè una creazione pensata cum’è una mascina à vultà in a storia. Una rialisazione dinamica d’Orlando Forioso chì conta a persunalità di Paoli in leia cù i scontri maiò di a so vita. In u seculu di i Lumi, ci hè a visione europea è umanista di Paoli in u cuntestu isulanu. 

U titulu “Aspittendu à Pasquale Paoli” hè un’allusione à u capi d’opera di Samuel Beckett “En attendant Godot”. Dunque, Orlando Forioso hà imaginatu chì Paoli hè “aspettatu” in Corsica è in altrò. Mais quale l’aspetta ? I Corsi chì cercanu à liberassi da Genuva ? U volenu ellu o qualsiasi altru liberatore ? Clemente, u fratellu, l’aspetta ? Di sicuru ma per chì fà ? Micca pè a listessa ragiò chè a so surella Maria chì spera u so ritornu. È tutti quelli chì bramanu ghjustizia, libertà l’aspettanu ? È i so nemichi ? L’aspettanu pè tumballu ? Cusì, l’aspettera hè a chjave pè cuntà un omu in u linguaghju teatrale mudernu è, dopu, a storia d’un populu. Ci participeghjanu : Marie-Paule Franceschetti, Roselyne De Nobili, Malù Avazeri, Michele Onori, Francè Falcucci, Thomas Bronzini, Maryline Leonetti, Antoine Maestracci, Orlando Forioso.