U famosu gruppu di rock in lingua corsa hà esciutu, qualchì tempu fà, u so ultimu dischettu : l’abbramante. Sedeci tituli chì trattanu, à modu di a squadra, d’una tematica liata à a spiritualità.

In u 1997, dui amichi, Paul Valot è Denis Buffignani, si ritrovanu à l’Università di Corsica. Diventeranu amichi è anu da sparte, inseme, a listessa passione di u rock cù influenze diverse (Led Zep, Deep Purple, Motoread…). Di issa passione, à mezu à un ponte musicale è puliticu, nascerà, qualchì tempu dopu « Erin » (Irlanda in gaelicu). A particularità serà d’aduprà a lingua corsa... Ma subbitu, u gruppu si scarta da l’altre strutture rock nustrale in lingua nustrale. Versi un pocu « rif », hard-rock o prugressistu chì li permettenu di prisentà creazione di qualità maiò. « Pisemi, prima à a musica, spiega Paul Valot, ghitarristu, è dopu, ci sò i scritti chì ghjunghjani à accuncià si. »

Di a prima squadra, ferma oghje, Paul è Denis, l’altri avendu sia arrestatu sia cuntinuatu cù d’altri cum’è Tintin Sanna, Patrick Nuttoni o Philip Bresson. È unepochi di dischetti sò nati : « Erin » (eponimu, 2007), « Sempre più chè tè » (2010) è « Vogliu » (2021). Si pò dì, quantunque, chè a struttura hà aspettatu qualchì tempu nanzu di passà à u terzu dischettu, « u nosciu cutidianu ùn ci hà micca parmessu di travaddà cum’è a vuliami, preciseghja Denis Buffignani, dunqua, ci hè vulsutu à aspittà qualchì tempu. Ma dipoi u 2023, avemi fattu una masterisazioni di i trè primi è appruntatu u quartu esciutu avà. »

Cù « L’abbr amante », issu « passaghju » trà a vita è a morte, l’autori c’invitanu à un viaghju musicale di sedeci tituli in’un ambiu particulare chì marca una tappa in u percorsu di u gruppu. Qualità di i testi, musica più ricercata, blues, ballata acustica, heavy-rock, qualità di u sonu, a struttura hà riesciutu à sviluppà un ambiu chì face a so grinfia dapoi più di vinti anni, ma cù una certa maturità in più chì face a so ricchezza. Ma Paulu è Denis sò accumpagnati da Bruno Vidal à a batteria (tercanu chì sona cù parechji gruppi) è Nadège Gortchakoff chì porta assai cù a so voce linda induve pudemu ritruvà « accenti » di Pathy Smith…

« Nadège hà un parcorsu particulari, aghjusta Denis Buffignani (ghitarra, bassa), quand’edda hè ghjunta quì, ùn parlaia micca corsu. Oghji, parla è canta senza difficultà. Hà fattu un travaddonu ! In quantu à Bruno, u so ritimu porta un soffiu novu à l’insemi. »

Prufessore d’inghlese in Vicu, Nadège campa in i bagni di Guagnu cù so cumpagnu. Stallata quì dapoi trè anni, hè stata invitata da Bruno « Nono » Vidal per aghjunghje u gruppu induve ella porta qualcosa in più cù a so sunurità, dolce, forte, alta o bassa. Cù a particularità d’avè amparatu a lingua nusrale in trè anni. « Sò sempre in cuntattu cù a lingua corsa è cercu à fà prugressi... »

« L’abbramante » sona cum’è un umagiu. Umagiu nanzu à tuttu, à Yvan Colonna (YC 2022), « una sparizioni chì hà toccu tutta a sucetà corsa, pocu impremi a famidda pulitica » a zitella di Denis Buffignani (Quanda notti), « una suffrenza di veda i nosci ziteddi dopu à una spiccanza » amichi aiaccini (Rock n Roll in Aiacciu), « tanti cumpagni di strada... » è un’uchjata à Paul Quastana cù « Chjarantana », « Feci parta d’issu gruppu... »

Issu dischettu ci face dinò scopre una dimensione appena spirituale cù « L’abbramanta » è « l’omu novu », « una manera d’invità la ghjenti à andà circà in sè, virtù chì sparisciani. »

Eppo « Saetta » hè una scelta, quella d’un pezzu musicale senza parolle. « Una cumpusizioni fatta u ghjornu d’una timpesta. »

L’energia « rock » d’Erin li dà un’identità propria. Denis scrive a maiò parte di i tituli è cumpone cù Paul. « Prima, avemi messu tutti i nosci idei in cumunu. Dopu, avemi cumpostu è messu i musichi à nantu. Cusì, a lingua corsa hè più linda. Ognunu porta a so petra. Hè un travaddu di squadra... »

 U gruppu hà ottenutu u preciosu labellu « Ricordu » chì face valè u talente di l’autori è li permette d’apresi ver d’altri orinzonti. « L’abbramanta » girerà in Corsica. Aspettendu, u dischettu hè dispunibule nantu à e piattaforme specializate o nantu à chjave USB. U sonu « Erin » face a so strada dapoi vinti anni, cù arnesi muderni à mezu à un filu rock ch’ùn scambia micca è chì face a so ricchezza.

Origine : Journal de la Corse