L’INRAP (Istitutu Naziunale di Ricerche Archeologiche Preventive) in Torra nant’à a cumuna di Coghja, hà scupertu vistiche di dui bastimenti è d’una fossa di l’epuca neolitica quandu i primi agricultori si stallavanu in Corsica. Una scuperta scarsa in l’isula pè l’INRAP chì apre nove pruspettive nant’à i primi spazii di vita in l’isula. Un diannosticu preventivu, cunduttu l’annu scorsu, avia digià previstu vistiche d’una struttura di u Neoliticu anzianu. U scavu di u 2025 hà cunfirmatu sta struttura è ne hà scupertu una seconda più anziana. D’altrò, s’aspetta i risultati di parechji analisi. L’archeologhi anu trovu vistiche di muri di dui bastimenti distinti cù picculi pali di sustenimentu, appena di mubiglia, di ceramica è arnesi in petra chì sò in traccia d’esse analisati. In quant’à a fossa scuperta, hè più recente chè i dui bastimenti. Puderebbe esse di a perioda trà 3300 è 2200 nanz’à Cristu. Una struttura induve ci hà campatu una pupulazione in sta zona.