13 di ghjugnu 1981, nove anni dopu a finale persa contr’à l’OM, u SECB vince a cuppa di Francia contr’à Saint-Etienne. Pè Didier Rey, universitariu è storicu, sta vittoria ùn hè micca stata valurisata cum’è l’epupea di u 78 è hà vulsutu capì perchè. A livellu spurtivu, si capisce chì vince contr’à u Torino o u Sporting Lisbonne hè più prestigiosu chè contr’à Caen o Martigues. A vittoria accade à a fine d’un ciclu gluriosu pè u pallò corsu, chì hà principiatu in u 1963. Permette dinù di fà ricunnosce u valore di u pallò corsu in Europa. St’ultimu diventa l’imbasciadore di a presa di cuscenza di sè. Una cumunità si ricunnosce in sta squadra. D’altrò, 1981 simbuliseghja a fine d’un età d’oru per via di e dillusione spurtive è pulitiche accadute dopu.

L’autore evucheghja dinù a dimensione pulitica di st’evenimentu spurtivu cù e speranze di a Corsica l’annu di l’elezzione di François Mitterrand, primu presidente di a manca durante a quinta Republica, è chì hà prumessu di liberà i prugiuneri pulitichi corsi, valurisà a lingua è cultura corsa, dà à a Corsica un statutu particulare, a difficultà d’integrazione di u pallò corsu in u mondu spurtivu francese. Difatti, l’integrazione à e cumpetizione naziunale, bramata da i Corsi, hè accettata solu in u 1959 ma in cundizione è mudalità trumatisante. Ghjè l’annu di u novu Campiunatu di Francia amatore (CFA) cù e so squadre francese è quelle di l’Algeria culuniale ma micca a Corsica. Ciò chì inzerga l’isula. In fatta fine hè accettata in CFA ma cù solu una squadra isulana per via di u costu di spiazzamentu di e squadre cuntinentale in Corsica. In u 1965, u SCB è l’ACA diventate prufessiunale sò accettate senza difficultà in seconda divisione, eppuru i ghjucadori è publichi corsi sò spessu criticati pè pratiche ghjudicate incumpatibile cù u pallò. A ste critiche, i bastiacci rispondenu cù a presenza di a bandera corsa nant’à e so magliette durante l’epupea europea.