Un’aventura pè i sculari, presentata piazza à a catedrale di Cervioni, fundata nant’à un intrigu fittiziu chì invita i giovani dettetivi à scopre i misteri di u passatu grazia à una spassighjata in i carrughji di Cervioni. L’ogettivu hè di valurisà u patrimoniu è à tempu prumove a lingua corsa. In core di l’intrigu : una magia sminticata pò fà rinvivì à Pasquale Paoli quandu a Corsica n’hà u più bisognu. Cusì u Babbu di a Patria scala in Cervioni. U generale di a nazione deve mandà un messagiu pè salvà l’avvene di l’isula è di u mondu, ma manca una parolla. I participanti di stu ghjocu devenu ritruvalla. Per quessa, ci vole à risolve enimme pè cumpletà u messagiu.

U percorsu interattivu hè scumpartutu in sette temi, da a catedrale Sant’Eramu à Teodoru di Neuhoff. A ogni tappa, ci vole à risolve un’enimma pè scopre una lettera chì permetterà di ricustituì a parolla chì manca. Annabelle Dominici dirige l’operazione è guida i giovani participanti grazia à un manuale purghjendu l’elementi è i lochi di u percorsu. St’ultimu hè traduttu in corsu, spagnolu, francese, inglese, alemanu. L’iscrizzione hè pussibule vicin’à l’ADECEC. Pè i sculari, stu ghjocu di pista hè di rigalu in u quadru di una ghjurnata d’immersione à l’associu. Da quì l’estate 2026, stu dispusitivu serà dispunibule pè tutti, in particulare i turisti.