Si n’hè andatu à l’altru mondu Rigolu Grimaldi u 29 di nuvembre scorsu à 86 anni. Puetu di lingua corsa, anzianu currispundente di Corse-Matin in Parigi, crunistu in stu giurnale in u 1997 cun magnifiche puesie nant'à l'usi, a vità di tempi fà, cartuline è ritratti anziani. Autore di « In quelli tempi. En ce temps là la Corse », edizione Alain Piazzola, una racolta di ritratti anziani di a fine di u 19u seculu è di u principiu di u seculu, "Corsica di una volta, images du temps passé", è "Memoria corsa, photographies", i dui ultimi à l'edizione Somogy. Rigolu Grimaldi avia participatu à l’emissione Memoria chì dà a parolla à l’anziani nant’à Via Stella. Cuntava a so giuventù in Calacuccia, u so paese nativu, a Santa di u Niolu è in Ersa, paisolu di Granaghjolu. Dicia chì, tempi fà, ùn s'aspettava u capu d'annu pè dissi pace è salute. D'altrò, hà cuntribuitu à l'iconografia di numerose publicazione, in particulare e guide Gallimard nant'à a Corsica è quelle di u Parcu Naturale Regiunale di Corsica.