A cumunità di cumune di Lisula Balagna è a Cullettività di Corsica v’invitanu à duie cunferenze seguitate da una mostra cuncepita pè st’annu di cumemurazione. Cunferenze da 10 ore è mezu à meziornu.
Prima cunferenza di Pierre Couvidat-Gherardi : « Paoli da babbu di a Patria, una lascita antica »
U cunferenzeru studieghja u titulu di « Babbu di a Patria », u so sensu è i so  valori, da l’origine rumane à l’epuca muderna. Mette in risaltu a leia di Pasquale Paoli cù st’appellazione è evucheghja persunalità corse chì puderebbenu esse ancu elle “babbi” o “mamme” di a patria.

Seconda cunferenza di Pierre-François Marchiani « Sacralisazione Paolista » 
Un’analisi di a custruzzione memuriale ingiru à Paoli : cumu a storia si mischja à u mitu, cumu a so figura hè stata sacralisata dapoi u ritornu di e so cendere in u 1899 sin’à oghje, è cumu u XVIIIu seculu corsu era in u filu di sta trasmissione ?

In più di e cunferenze, si puderà vede sin’à 6 ore è mezu a mostra bislingua « A vita di u ‘Babbu di a Patria’ in u so cuntestu storicu », rialisata da l’INEACEM. Dopu puderà esse aduprata da insignanti è attori culturali.