Marti u 16 di dicembre à 6 ore è mezu, u Centru Culturale Universitariu presenterà a creatività artistica di i studianti. St’ultimi anu da restituì i sei mesi di travagliu durante l’Attelli Teatrali in Festa. Studianti ghjunti da e furmazione è filiere participeghjanu à st’attelli, lochi di scambii è di scontri. A tempu cuntribuiscenu à un prugettu cumunu. 

U 18 di dicembre, sempre à sei ore è mezu, a serata Scuperta hè una stonda musicale per scopre i talenti musicali novi di l’attelli di u Centru Culturale di l’Università di Corsica. Cum’è ogni annu, u Centru Culturale urganizeghja una restituzione di u travagliu di i so attelli. U scopu di isse serate hè doppiu : in prima si tratta di mette in lume i giovani chì principianu, ma dinò, di porghje li una scena incù mezi tecnichi ch’elli ùn anu micca di regula. Durante tutta a serata, a scena s’aprerà à parechji gruppi, canterini, musicanti, accumpagnati da i so intervenenti, da mustrà u travagliu realizatu in l’attelli di u CCU. Ghjè per voi, l’uccasione di scuntrà i giovani talenti isulani di dumane. Una stonda per tutti i gusti è ricca di surprese ch’ùn si pò mancà !