Tredeci anni dopu à u so ultimu dischettu, a canterina di Poghju d'Oletta hà da esce "Di mè n'avete fattu una Mamma" u 15 di ghjennaghju 2026. Un dischettu di sedeci creazione pruduttu da Ricordu, accumpagnatu da Christophe Mac-Daniel à u piano è à l'organettu, è da Marc'Andria Castellani sunendu a chitarra. Un'opera intima, truvendu l'estru in ciò ch'ella campa oghje ghjornu : a famiglia, a trasmissione, a memoria. Un titulu scrittu pè u so maritu è figliolu. Da zitella Anghjula Potentini canta a Corsica. In e fiere, à mezu à e voce, purtata da un babbu chì cantava. À 19 anni, Anghjula chita a Corsica pè u cunservatoriu di Bordeaux è dopu Parigi pè vede in altrò, amparà a vita ma micca pè u liricu. A principiu di l’anni duiemila, entre in u gruppu di pulifunia feminile Donni di L'esiliu, induve cantanu Izia Bartoli-Dau, Elisabeth Bottalico, Béatrice Habrard-Malaspina è Jacky Micaelli. Una prima aventura cullettiva, furmatrice, nanzu u bisognu di cantà sola.

In u 2006, signa un primu dischettu solo, “A lettera d'amore”, cuntenendu canti tradiziunali è omagi à a zitellina, à quelli chì li anu trasmessu ste meludie. Cù Patrick Mattei à fiancu à ella, seguitanu altri dischetti, cù creazione è a participazione di pueti è di meludie rialisate da Petru Santucci, Jean-Baptiste de Nobili, Carl'Antò Guastalli è Sonia Moretti, pè u secondu dischettu “Fiara” esciutu in u 2009. Un terzu dischettu esce in u 2012, “Ora Serena”. Rimanda à a trasfurmazione di a so vita persunale, trà scontru amurosu è futura maternità. In u frattempu, a vita s’impone. A maternità, i doli, i silenzii necessari. Canta menu nant’à a scena à mumentu datu ma ci rivene dopu perchè li manca. "Ùn si pò cumandà l'ispirazione", dice l’artista. Allora aspetta. Scrive u ghjornu ma micca a notte. Ricusa a musica d’ambienza, a pulluzione sunora, preferisce u silenziu o i paisaghji ch’ella traversa ogni matina passendu pè a bocca di Teghjime. Per ella, u cantu ùn hè un mistieru, hè un statu. Dice : “ùn facciu u cantu, sò u cantu”.

Anghjula Potentini hè dinù intermittente di u spettaculu dapoi quasi 25 anni. Deve scumbatte cù e rialità di stu mistiere. I cuncerti soli ùn bastanu micca. Diversificheghja dunque a so attività trà attelli sculari è cronache patrimuniale à a radiu. Ciò chì li permette di campà in Corsica, di ricusà i giri longhi è suligni pè qualchì cuncertu à l’annu.