Pè i cent’anni di a « missione Helbronner », a Cullettività di Corsica presenta a mostra numerica sott’à u cumissariatu d’Alain Gauthier, prufessore in Scienze di a Vita è di a Terra à u liceu Fesch d’Aiacciu da u 1971 à u 2003, geologu, biologistu è anzianu presidente di u cumitatu scientificu di u Parcu naturale regiunale di Corsica. Si pò vede nant’à isula.corsica

Sta mostra mette in risaltu u percorsu di prima trinca di Paul Helbronner. Alpinistu, spluradore è specialistu di geodesia (scienza chì s’interessa à a misura è à a capiscitura di a forma di a Terra). In u 1925, hà principiatu l’appicciatura geodesica di a Corsica à u cuntinente francese è fissatu l’altitudine di e più grande cime corse. Un travagliu di sicuru senza satellitu nè GPS, in cundizione difficiule.

Grazia à numerosi documenti d’archivii, ritratti è testimunianze d’epuca, site invitati à scopre un’aventura strasurdinaria in i paisagi muntagnoli è in i bivacchi d’altitudine. Hè un viaghju in quattru tappe pè cunnosce a missione Helbronner à livellu scientificu, storicu o umanu. 37 pannelli interattivi mischjendu testi, fiure è video presentanu u percorsu di a missione, u so travagliu maiò, e so manere di fà è e sfide pè riesce l’opera.

Prima parte : l’omu è u metudu
Face entre in a vita di Paul Helbronner. Da e so origine famigliale à u so impegnu scientificu pè l’alta muntagna, presenta dinù u metudu di triangulazione è l’evuluzione di i strumenti di misura.

Seconda parte : a Corsica trà scenza è mitu 
Ci hè vulsutu assai tempu pè cunnosce u rilievu di l’isula a più muntagnola di u Mediterraniu. Avemu quì e cartugrafie anziane di a Corsica è e sfide tenniche di l’epuca.

Terza parte : a spidizione di u 1925
Hè presentata cù numerosi documenti d’epuca chì ci portanu nant’à e più alte cime corse in core d’una prova scientica maestra. 

Quarta parte : risultati è pusterità 
Chì ferma oghje di e misure ottenute da Helbronner ? L’ultima parte di a mostra mette in risaltu a lascita scientifica ch’ellu hà trasmessu.