S’invitanu in Lumiu e musiche tradiziunale è di cumpusizione per a sesta edizione d’Invernale à u spaziu Edmond Simeoni. I cuncerti principianu à 8 ore. U primu serà quellu di u gruppu Isulatine. A pulifunia corsa à u feminile trà tradizione è creazione. Trè voce cumplementare, arradicate in a memoria di l’isula, tessenu un cantu sensibule è putente, purtatu da una scrittura cuntempuranea in lingua corsa. U 6 di ferraghju, u gruppu Kalakan chì vene da u paese bascu. Sta furmazione rinnova u cantu di stu paese cù solu e voce è e percussione. Trà tradizione antica è energia cuntempuranea, u terzettu prupone una musica ritmica, organica è arradicata in a lingua basca. U 7, u gruppu Mimoria tramandata pè a memoria musicale è storica in u cantu pulifonicu. Trà ricerca, creazione è trasmissione, face dialugà tradizione vucale è racontu pè fà rinvivì e grande periode di a storia isulana. 

L’8, senterete un master classe di pulifunia corsa. Durante isse 6 ore d’accademia, i stazienti saranu purtati à travaglià canti prufani è sacri incù anziani cantadori di u gruppu A Filetta. I so prufessori sò Jean-Luc Geronimi, Ceccè Acquaviva, Stéphane Serra, José Filippi, Jean Sicurani è Jean-Marc Fabrizi. U 9 di ferraghju, Shagan & Altana pè un viaghju sunoru trà Oriente è Occidente, mischjendu cantu bulgaru, cantu di gola induve ùn senterete micca parolle ma soni venendu da i musculi di a gola, percussione è strumenti numadi. Una musica libera, ipnotica è puetica, cù risunenze assai eurasiane. Infine, u 10, u gruppu Tarentella chì rinnova e musiche di u mezzogiorno, vale à dì u sudu di l’Italia. Cù u tamburello, senterete canti tradiziunali, chitarre, organetti è tessiture elettro-acustiche pè una sperienza ritimica intensa.