U mese di ferraghju hè di regula u mese di i carnavali. In Brandu, à u paisolu di Purettu, hè rinvivitu u carnavale corsu tradiziunale dapoi u 2000. Cusì, l’associu "Carnavale di Brandu" face rinasce sta tradizione brandinca. Avemu un spettaculu incantevule cù maschere, persunagi fantastichi è travestimenti vegetali creati da artigiani lucali. Rispechja cusì i raconti di l’anziani. I custumi, veri umagi à a natura, affascineghjanu per via di a so originalità è autenticità. Di sicuru, sgumentanu quelli avvezzi à i carnavali cuntempuranei. Fora di u spettaculu visuale, stu carnavale hà una dimensione sociologica prufonda. In core di prucessiò, u matrimoniu simbolicu di Rampuffu, u rè di u carnavale, puntatu da u Cancilliere è scurtatu da i sbirri accumpagnatu da i sunadori, vestuti cù custumi tradiziunali corsi. Hà da maritassi cù a Sposa, chjamata dinù Purcellina è Stroncheghjetta. Porta una maschera di zucca. u matrimoniu pè un annunziu simbolicu, simbulu di fecundità di rinascita di a natura à u prossimu veranu 

Ind’a prucessiò, truvemu l’"orchi", incarnazione di a forza salvatica di a natura, vestuti cù pelle caprune è maschere di bestie. Devenu fecundà a terra pè annunzià l’evenimentu di u veranu. Dopu, i "tumatori", guardiani di a saviezza antica, provanu senza riesce à parà l’ardore di l’"orchi", chì tinghjenu di carbone i visi di e giuvanotte. Dunque, stonde di risa è di gioia. Avemu ancu Prete Vinaccia chì porta un catinu è una spazzuletta, u Pillicciaru purtendu una maschera di zucca è un paghju di corne, u Vechjaconu è a so maschera di suvara. Tutti ciarlanu cù i spettadori è li facenu scherzi. Dopu à un ballu di nanzu à a Funtana vechja di u paese, si ritrovanu nantu à a piazza di a Torra pè celebrà u matrimoniu di Rampuffu è di a Sposa, cù u merre chì prumette inde u so discorsu mare è mondi. Dopu à a girandula cù l’Orchi, hè l’ora di u prucessu di Rampuffu, accumpagnatu da u boia è i trè sbirri. U boia accusa ad alta voce à Rampuffu d’esse à causa di ogni male ed hè cundannatu à a morte. Tandu tutt’ognunu intona :

« O Carnavà ùn ti n’andà

T’ai pigliatu u salcicciu

Ci ai lasciatu u baccalà

O carnavà ùn ti n’andà

Avemu da beie è da manghjà ».

Di sera, si piccia focu à Rampuffu, incarnazione di i peccati di l’annu scorsu. Tutti l’anni, si sceglie una celebrità cunnisciuta in u mondu sanu. Infine, un banchettu è una serata musicale compienu u spettaculu. Ci vole à di dinù chì a manifestazione hè evuluata quist’annu. A mane di u sette di ferraghju, à u prugramma ghjochi zitellini à 11 ore, banchettu à meziornu è surtita di e maschere à duie ore è mezu.