Serà un grande spettaculu musicale caritativu, direttu da Francky de Peretti cù artisti corsi è naziunali à prò di l’antenna corsa di l’associu. Canteranu Patrick Fiori, Jean-Pierre Marcellesi, Claire Keim, Jean Menconi, Florian Carré, Bénabar o Jean-Charles Papi. Si senteranu famose canzone naziunale è internaziunale di l’anni 1985 è 1986, in omagiu à Coluche. 40 anni dopu a creazione di i restos di u core, a sulidarità si sprime sempre in musica. Creata apposta pè l’evenimentu, a truppa addunisce quasi una cinquantina d’artisti canterini, musicanti, ma ancu umuristi è ballarini ingiru à un prugettu artisticu benevulente. Di sicuru, l’incasci anderanu à i Restos di u core di Cismonte di Pumonte. 

Régis Gomez, musicante aiaccinu è organisadore di u spettaculu,  hà iniziatu in u 2014 st’aventura umana è artistica. L’equivalente in Corsica di i spettaculi di u gruppu di musica Les Enfoirés. U prugettu hè natu prestu grazia à u sustegnu di l’artisti, di l’instanze di i risturanti di u core, è hè statu subitu un successu. Nant’à e duie prime edizione, quasi 100 000 euri sò stati incasciati. 

Riservazione nant’à u situ helloasso.com o allora direttamente à u Palatinu, strada di u Stilettu in Aiacciu i luni è ghjovi da duie ore à cinqu’ore è i marti da 9 ore à meziornu.