Dipoi parechji anni, a Cità di Bastia hà in core di valurizà è di ricunnosce a primura maiò di e lingue materne cum’è vettore d’identità, di cultura è di tramandera. Cusì, participeghja à a Ghjurnata internaziunale di a lingua materna di l’UNESCO, prupunendu ogni annu azzione culturale aperte à tutti. Pè l’edizione 2026, a Cità prupone un spettaculu vivu, "Au bout de ma langue", è una prughjezzione-dibattitu intornu à u ducumentariu "Lingua Mater", invitendu u publicu à riflette à i ligami stretti trà lingua, identità è percorsu di vita.

U spettaculu "Au bout de ma langue" scrittu da Simon Grangeat è rialisatu da Tal Reuveny sabbatu u 21 di ferraghju à 2 ore à l’Alb’Oru: A storia : un giuvanottu di 18 anni s’appronta à dumandà a so prima carta d’identità francese. In stu locu simbolicu, s’arricorda chì, quand’ellu era zitellu, hà fughjitu a guerra in Siria è scupertu un novu paese, una nova lingua. Trà silenziu, amparera è trasmissione, "Au bout de ma langue" conta un chjassu intimu versu una lingua nova senza mai scurdassi di quella di a zitellina. Ghjè un spettaculu à parte da 9 anni. Entrata di gratisi –ma hè megliu à riservà à u 06 84 00 02 25

U documentariu "Lingua Mater" di Massimo Garlatti-Costa ghjovi u 26 di ferraghju, 6 ore à a Casa di e Lingue in cullaburazione cù l’Università di Corsica. S’interessa à l’identità, à a lingua è a storia di e minurità linguistiche in Auropa. A prughjezzione si compierà cù un tempu di scambii cù u realizadore.