A direzzione di a bibliuteca di studiu è di ricerca Tommaso Prelà in Bastia hè l’editore di un bellissimu libru. A so autora hè una specialista di a cartugrafia storica di a Corsica. Stu catalogu hè u quartu publicatu da sta bibliuteca è cum’è pè i trè primi hè un omagiu à i dunatori di u passatu, cunnisciuti o nò, o ancu sminticati. E carte presente in stu libru sò quelle racolte da u duttore Antoine Mattei, di Cagnanu. Ghjè un viaghju illustratu è un’analisi cartugrafica originale di a cullezzione Antoine Mattei.

St’ultimu avia una grande cullezzione cuntenendu micca solu carte ma dinù manuscritti, tavule, piani è libri tutti nant’à a storia di a Corsica. Avemu parechji documenti manuscritti scarsi in u fondu Mattei. Documenti fatti da Genuvesi è dopu Francesi durante l’avvicinamenti di u Reame di Francia versu l’isula. Si pò ritene di ste carte, dapoi i principii di e riprisentazione geografiche, chì a Corsica si trova in ogni categuria, racolte d’isule, atlanti, carte d’interessi statistichi è sociologichi. Dunque, un piazza impurtantissima di u territoriu corsu in u Mediterraniu.