L’associu “Arte flamenco” in cullaburazione cù u centru culturale “Una Volta” in Bastia organiseghja a quinta edizione di u Scontru flamenco. L’occasione di mette in risaltu st’arte avendu origine andaluse è d’avvicinallu à a nostra tradizione musicale. U flamenco si scumparte trà cantu, ballu è chitarra. Un arte chì, à a crucivia di u meziornu di l’Europa, di a musica araba, di l’influenze berbere, ghjudee è cristiane, s’hè sviluppatu dapoi u VIIu seculu cù l’affaccata di u strumentu di musica oud. Sta musica cù sunurità orientale hà numerose particularià cù u cantu tradiziunale corsu, in particulare a nanna o u lamentu (chjamatu solea in flamenco). Cusì, pè mette in risaltu ste sumiglie cù a Corsica, Anne Giudicelli hà creatu u scontru flamenco in u 2022. 

À u prugramma, scambii trà artisti corsi è andalusi, ma ancu cù u publicu, stazii pè principianti è cunfirmati, cunferenze in corsu è in spagnolu, master class, iniziazione à u flamenco. Quist’annu, u tema sceltu hè a lascita è a trasmissione. Pè a prima volta, l’associu “Arte flamenco” hà da prupone à tutti una scuperta di st’arte andalusu pè capì u spiritu è u sensu. In quant’à u cantu, participeranu Pepe Haro, chitarristu, autore, cumpunidore andalosu, chì prupunerà un travagliu musicale nant’à u cantu flamenco è l’artistu corsu Petru Pà Lorenzi pè riprisentà a giovana generazione di canterini corsi. Pè u ballu, serà à l’onore u tango di Granada è u seguirìya, un battimanu chì ghjova à accumpagnà i ballarini, canterini è chitarristi di flamenco cù l’artista ballarina Myriam Tchalian. D’altrò, a scrittrice Marie Ferranti hè l’invitata d’onore di sta manifestazione durante a so cunferenza nant’à “Radiche in spartimentu : lascita è trasmissione trà a Corsica è u flamenco" animata da Serena Talamoni è Rosa Giovinazzo, sabbatu l’11 d’aprile à duie ore è mezu. Infine, hè previstu un ballu di Sevilla in centru cità pè compie l’evenimentu. Infurmazione è iscrizzione nant’à https://arte-flamenco.net/