Sta manifestazione nova hè stata creata da l’associu Monte Niellu pè rinfurzà a rinomina di ste duie attività. U primu ghjornu hè pè i sculari cù l’amparera di a pesca, droni sottumarini, rialità virtuale, mostre dirette da l’associ Mare Vivu è u PNRC. I dui altri ghjorni, u publicu fighjerà filmi nant’à a caccia à u cignale. Sò previste una furmazione à a securità pè i cacciadori è una seduta di certificazione di i cursini cù un ghjudice. L’evenimentu serà dinù l’occasione d’un omagiu à Michel Carrega partutu à l’altru mondu in u 2024. Hè statu vicicampione olimpicu in Munich in u 1972, 21 volte campione di Francia di tiru spurtivu, quattru volte campione di u mondu individuale… Cusì, fucili, medaglie è ricordi persunali seranu sposti à a merria di Miomu. In quant’à a pesca, l’animali ùn seranu micca tombi durante a manifestazione.

D’altrò, l’usi tradiziunali sò in messi in risaltu. Sò simbuli di passione è d’arradichera culturale forte chì rinforza a vita suciale di a Corsica. I duminii di a caccia è di a pesca arricchiscenu è trasmettenu dinù a lingua corsa trà giovani è menu giovani. Infine, fendu scuntrà quelle è quelli chì facenu campà caccia è pesca, Storie d’omi è di natura mette in risaltu a lascita di i sapè fà è e leie tesse cù u territoriu chì si fondanu nant’à l’osservazione è u rispettu di a natura.