Dopu essesi tramutatu in L’Isula è Purtivechju, stu famosu appuntamentu nant’à u vinu, volta in u so locu storicu cù una sessantina di vignaghjoli, trenta artigiani è numerose animazione. L’evenimentu hè accumpagnatu da u cunsigliu interprufessiunale di i vini di Corsica. A manifestazione si fonda nant’à parechje animazione cum’è e tastature, l’attelli, u cuncertu di I Pignotti, u cuncorsu regiunale di i vini di Corsica, a Rota di u vinu. St’ultima hè una sperienza ludica pè scopre l’universu di a vigna corsa. I masterclass, vale à dì scontri trà esperti è nuvizii in gastronumia è vini, sò animati da prufessiunali. Un’occasione pè i visitadori di scuntrà i vignaghjoli è scopre i vini novi.

D’altrò, fora di a fiera, hè previstu u tavulacciu di i vignaghjoli à u duminiu Pieretti venneri l’8 di maghju di sera à 7 ore. A fiera principia sabbatu u 9 à dece ore, da 10 ore è mezu à 6 ore è mezu, masterclass in gastronumia è vini. 11 ore : inaugurazione ufficiale, 3 ore: annunziu di i risultati di u cuncorsu regiunale di i vini di Corsica. 9 ore : serata di tastatura è cuncertu di i Pignotti. Dumenica u 10, apertura à 10 ore, da 10 ore è mezu à 5 ore è mezu, masterclass. 5 ore è mezu : chjuditura di u drive.