Trè serate di cuncerti di Bastia à u centru culturale L’Alb’oru è altri lochi di Bastia cù artisti novi è persunalità di a scena pop è elettronica. E Musicale pruponenu una prugrammazione aperta trà pop indipendente, musiche elettroniche è nove voce di a scena francese è corsa. Frà l’artisti, Solann o ancu artisti lucali cum’è a balanina Carla Paoli. Cum’è l’annu scorsu, a manifestazione hà da scumpartesi in dui assi maiò : una prugrammazione “Main Stage” chì presenta a creazione isulana è l’emergenza prufessiunale. Dopu i “marosuli sunori” chì prevedenu cunferenze è cuncerti-scontri di rigalu. 

L’edizione 2026 principia ghjovi u 4 di ghjugnu à 8 ore cù Jess è Flore Benguigi- DJ SET. Jess hè un’artista impregnata di culture siciliane è rumene pè un universu musicale di funk, house, elettronica. In quant’à Flore Benguigui hè un’artista impegnata è sviluppa un universu persunale musicale feministu è di creazione sunora. U lindumane, venneri u 5 di ghjugnu, serata di rigalu, à 6 ore è mezu : e Musicale s’addunisceranu à K’Scolta è Le RéZo, dui partenari culturali pè valurisà a creazione isulana. Quì sò artisti selezziunati chì anu prugetti musicali ambiziosi. Averemu dinù à 9 ore è mezu Yann Wagner,  persunalità di a scena alternativa francese, trà rock è musica electronica. 

Sabbatu u 6, canterà Solann à 8 ore è mezu. Autora, cumpunitrice, interpretadora, avia esciutu l’annu scorsu un priumu dischettu « Si on sombre ce sera beau ». U so titulu « Rome » era diventatu single d'oru è avia vintu a vittoria di a musica, categuria di a rivelazione feminile. U secondu dischettu hà da esce cù un stile musicale chi mischja neo folk è parolle impegnate.  E so canzone trattanu di u feminismu, a leia cù u corpu, u mondu di a notte, a lotta di e classe è e sfide di a feminità. Dopu à Solann, ci serà Carla Paoli. St’ultima hè in u filu di Solann o Pomme. L’estate scorsa, avia esciutu e so prime canzone « Que toi » è  « Emo » è avia vintu u premiu di l’artista zmergente à e K’Scolta Music Awards. Infine, ste musicale si cumpieranu dumenica u 7 di ghjugnu à 5 ore à u teatru di l’Alboru pè una serata pupulare è festiva.

In quant’à i marosuli sunori, sò : cuncerti-scontri fora di l’Alboru in lochi di vita cum’è A Casa di l’Anziani, L’Arnia, Les Restos du Cœur, l’EHPAD A Casa Serena in San Martinu di Lota. E cunferenze sò previste à a Casa di e scienze è à l’Alboru nant’à a musica, imbusche maiò di u spettaculu vivu cuntempuraneu, a lotta contr’à e viulenze è fastidii sessisti è sessuali, e dimarchje eculogiche… Infurmazione in più : https://www.musicalesdebastia.com/