Un scavu di l’INRAP (Istitutu Naziunale di Ricerche Archeologiche Preventive) in Meria hà sbuccatu nant’à e vistiche d’un grande bastimentu di i Vu è VIu seculu, dunque trà u periodu di l’Antichità tardiva è u principiu di u Medievu. Un edifiziu chì pare organisassi nant’à omancu trè pezze fatte cù muri custruiti in matticciu lucale. Sò vistiche in u quadru d’un prugettu di custruzzione individuale. Una scuperta chì puderebbe dà infurmazione nant’à l’organisazione d'un anzianu paisolu in leia cù u sbarcatoghju anticu scupertu l’annu scorsu. L’archeologhi anu scupertu dinù pezzi di stuvigliame è di ceramica, di cunsumazione pè beie, manghjà è scucinighjà. Elementi chì facenu pensà à un locu di vita.

Cù u sbarcatoghju scupertu vicin’à stu bastimentu, abbisugnendu manu d’opera, l’archeologhi pensanu chì u locu era un paisolu stallatu trà a fine di l’epuca rumana è i principii di u Medievu. Parechje case puderebbenu esse state custruite cum’è quella scuperta durante stu scavu. St’operazione archeologica deve compiesi à a fine di ghjugnu. E squadre di l’INRAP teneranu e pezze scuperte durante dui anni pè studialle megliu in i so laburatorii. Dopu, e vistiche puderanu esse presentate altrimente, per esempiu durante cunferenze, publicazione o ind’una cullezzione permanente di museu.