Ghjè una presentazione storica di l’edifiziu, una lettura d’affreschi è fotografie chì ne restituiscenu a luce, a dulcezza di i culori è a presenza silenziosa di e sante è santi riprisentati in sti muri dapoi seculi è seculi. Tempi fà, a cappella Santa Cristina era impurtante in core di e terre assai ricche. Duie surgente abbundante assicuravanu a vita agricula è pasturale di u situ. Anu alimentatu dinù termi rumani à u portu di Campuloru. Ciò chì illustra a qualità di st’acqua toccu l’Antichità. I sei mulini à l’ingiru di a cappella rammentanu quant’elli participavanu à l’attività ecunomica è suciale di u territoriu. Dopu, ste custruzzione sò andate à male. Dunque, ci hè bisognu di preservà ciò chì ferma è di trasmette a memoria di stu patrimoniu. Sti mulini sò testimoni d’epuche andate induve l’ingeniusità umana s’adattava à e risorse dispunibule. Cusì, cù stu libru di Francis Orsini, in u quadru di l’associu di l’amichi di Santa Cristina, paisani, visitanti è passiunati di patrimoniu anu un sguardu chjaru, accessibile è fidu à stu locu di prima trinca. U so prezzu à bon pattu cuntribuisce direttamente à l’azzione di presentazione, di valurisazione è di trasmissione à prò di l’edifiziu. Un arnese di scuperta, memoria spartuta è omagiu à un patrimoniu chì appartene à tutti. Accumpagna è prulungheghja u scontru cù a Santa.

Francis Orsini, natu in Valle di Campuloru, si primureghja di a memoria è di u  patrimoniu di a so terra nativa. Anzianu insignante, face à prò di a messa in risaltu di l’edifizii religiosi di a regione dapoi parechji anni. In l’associu di l’amichi di a cappella Santa Cristina, agisce à fiancu à una squadra dinamica d’animatori benevulenti impegnati, dispunibili è passiunati pè valurisà u monumentu. Inseme, facenu campà ogni ghjornu a so storia, trasmettenu l’evuluzione architetturale dapoi l’origine, danu infurmazione nant’à i so affreschi è preservanu l’anima particulare chi face di Santa Cristina un locu rimarchevule. L’autore hè dinù un fotograffu attente, passiunatu di scrittura è di trasmissione. Mette a so sensibilità è u so sguardu à u serviziu di stu patrimoniu cù sempre a primura di l’esattezza, di a bellezza è d’esse fidu à i lochi. Hè dinù l’autore d’una video di presentazione di l’affreschi.