Stallatu in core di a citadella, in u palazzu di i guvernadori, u museu di Bastia rimette in risaltu e so cullezzione permanente è appronta una grande cullezzione di corta durata st’estate. A cità di Bastia face una campagna di cumunicazione pè incuragì abitanti è visitanti à entre in u stabilimentu chì presenta più di sette seculi di storia corsa.

Scumpartutu nant’à 19 sale, u percorsu permanente vi face scopre o ritruvà più di 300 ogetti è opere. Conta a storia di Bastia dapoi a so fundazione da a republica di Genuva à a fine di u 14u seculu sin’à a so integrazione à a Francia muderna. In stu quadru, sò presentati a nascita è u sviluppu di a cità, u so rolu di capitale è di centru di putere, u so splendore culturale è e so cullezzione di prima trinca. In ste cullezzione, avemu una trentina di pitture taliane di a lascita di u cardinale Fesch, di i diciottesimu è dicennovesimu seculi. U percorsu si compie cù a cullezzione Carlini, nant’à a perioda rivuluziunaria è napuleuniana chì cuncoglie ogetti d’arte è pezze in leia cù Napulione Bonaparte.

D’altrò, una mostra nova hè prevista à parte da u 4 di lugliu sin’à u 19 di dicembre. Si chjama “Corsica-Maghreb, una storia in spechju da u 1830 à u 2026”. Ci truvemu quasi 400 opere, ogetti, documenti è video nant’à e rilazione trà Corsica, Algeria, Tunisia è Maroccu fendu dialugà l’anziani corsi spatriati in Africa di u Nordu cù i magrebbini campendu oghje ghjornu in Corsica.