Sin’à u 20 di settembre, sta mostra fotografica di l’associu Sguardi prupone ghjust’appuntu un sguardu artisticu nant’à ogni forma di u football. Stu sportu hè presentatu cum’è un veru fattu culturale è sociologicu trà storie persunale, memorie cullettive, speranze, cunflitti. Ci truvemu e fotografie di Hans van der Meer nant’à i ghjucadori amatori spapersi in Europa. Luntane da i campi di ghjocu tamanti, ste fiure rispechjanu una pratica ordinaria di u pallò, un sportu suciale induve ùn si cerca a perfurmenza. In u listessu filu suciale, e fiure di Michael Zumstein dipinghjenu una giuventù africana induve a maglietta di football incarna a speranza di un’ascensione suciale palisendu à tempu l’inugualità mundiale è a forza di u sonniu spurtivu. 

Altru elementu di a mostra : “Le stade de la lose”, illustrazione di u titulu di u libru d’Olivier Cablat, fotograffu è cullezziunadore, rammenta a memoria di u football cù persunalità fora di e norme, da Bernard Tapie à Rolland Courbis è dinù i drami chì anu traumatisatu u mondu di u pallò cum’è a catastroffa di Furiani. Furiani, ghjè dinù u ricordu di l’epupea bastiaccia illustrata da a sequenza 1977-1978 di Gérard Koch. Ghjè quì un affrescu fotograficu fattu cù e prime pagine di a stampa lucale è fiure inedite trà stonde di gloria è di lacrime.

A mostra “Histoire(s) de foot” ghjoca dinù e prulungazione in litteratura. Invitendu à ciuttassi in “La mélancolie de Zidane”, u scrittore Jean-Philippe Toussaint analiseghja a spulsione di stu famosu ghjucadore dopu a so capata durante a finale di cuppa di u mondu contr’à l’Italia in u 2006. Stonda scema di a storia di u football induve i terreni diventanu ogni tantu lochi di rivalità ma dinù di baruffe cù e video in neru è biancu “explosions foot” d’Ange Leccia. U terrenu si face dunque à mumentu datu spaziu di tensione cullettiva. Una metafura di u spettaculu è di u cumbattu.